இந்தியர் வரைந்த ஒரு ஓவியம் ரூ.167.2 கோடிக்கு ஏலம் எடுக்கப்பட்டு சாதனை; ஓவியத்தை வாங்கியது யார்?
செய்தி முன்னோட்டம்
இந்திய நவீன ஓவியக்கலையின் முன்னோடியான ராஜா ரவி வர்மாவின் யசோதாவும் கிருஷ்ணரும் என்ற புகழ்பெற்ற எண்ணெய் ஓவியம், மும்பையில் நடைபெற்ற ஏலத்தில் ரூ.167.2 கோடிக்கு ($18 மில்லியன்) விற்பனையாகிப் புதிய உலக சாதனை படைத்துள்ளது. புதன்கிழமை (ஏப்ரல் 1) அன்று நடைபெற்ற 'சாஃப்ரான் ஆர்ட்' வசந்த கால நேரடி ஏலத்தில், இந்தியத் தொழிலதிபர் மற்றும் சீரம் இன்ஸ்டிடியூட் ஆஃப் இந்தியாவின் நிறுவனர் சைரஸ் பூனவல்லா இந்தப் பிரம்மாண்டமான விலைக்கு அந்த ஓவியத்தைக் கைப்பற்றினார். இது இந்தியக் கலைப் பொருட்கள் ஏலச் சந்தையில் இதுவரை இல்லாத ஒரு மிகப்பெரிய மைல்கல்லாகக் கருதப்படுகிறது. கடந்த ஆண்டு எம்.எஃப்.ஹுசைனின் ஓவியம் படைத்த ரூ.118 கோடி சாதனையை இது தற்போது முறியடித்துள்ளது.
ஓவியத்தை வாங்க போட்டி
விறுவிறுப்பான ஏலப்போட்டியும் சைரஸ் பூனவல்லாவின் வெற்றியும்
மும்பையில் நடைபெற்ற இந்த ஏலத்தில், சர்வதேச அளவிலான கலைச் சேகரிப்பாளர்கள் மத்தியில் கடும் போட்டி நிலவியது. ஆரம்பத்தில் இந்த ஓவியம் ரூ.80 கோடி முதல் ரூ.120 கோடி வரை விற்பனையாகலாம் என்று கணிக்கப்பட்டது. ஆனால், ஏலம் தொடங்கிய சில நிமிடங்களிலேயே அதன் மதிப்பு மின்னல் வேகத்தில் உயர்ந்து, இறுதியாக ரூ. 167.2 கோடியை எட்டியது. இந்த வெற்றிகரமான ஏலத்திற்குப் பிறகு பேசிய சைரஸ் பூனவல்லா, "இந்த தேசியச் சொத்தை வாங்கியது எனக்குக் கிடைத்த கௌரவம் மட்டுமல்ல, இது ஒரு கடமையும் கூட. இந்த அரிய படைப்பை அவ்வப்போது பொதுமக்களின் பார்வைக்குக் கொண்டு வர நான் முயற்சிப்பேன்." என்று பெருமிதத்துடன் தெரிவித்தார்.
யசோதாவும் கிருஷ்ணரும்
ஓவியத்தின் நுணுக்கங்களும் சிறப்புகளும்
1890களில் ராஜா ரவி வர்மாவின் கலைப் பயணம் உச்சத்தில் இருந்தபோது இந்த ஓவியம் தீட்டப்பட்டது. யசோதா பசுவிடம் பால் கறக்கும்போது, குழந்தை கிருஷ்ணர் பின்னால் இருந்து ஒரு கிண்ணத்தில் பால் கேட்பது போன்ற மிக அழகான காட்சியை இது தத்ரூபமாகச் சித்தரிக்கிறது. ஒரு சாதாரண இல்லற நிகழ்வை, தெய்வீகத் தன்மையுடன் மாற்றும் ரவி வர்மாவின் கலைத் திறன் இதில் வெளிப்படுகிறது. ஐரோப்பிய யதார்த்தவாத பாணியையும், இந்திய இதிகாசக் கருப்பொருளையும் இணைப்பதில் அவர் எவ்வளவு வல்லவர் என்பதற்கு இந்த ஓவியமே ஒரு சான்று. டெல்லியைச் சேர்ந்த ஒரு தனிநபர் சேகரிப்பில் இருந்த இந்த ஓவியம் தற்போது பூனவல்லா வசமாகியுள்ளது.
பின்னணி
யார் இந்த ராஜா ரவி வர்மா?
1848 ஆம் ஆண்டு திருவிதாங்கூர் சமஸ்தானத்தின் கிளிமானூர் ராஜ குடும்பத்தில் பிறந்தவர் ராஜா ரவி வர்மா. இந்திய ஓவியக்கலையில் எண்ணெய் வண்ணப் பயன்பாட்டைப் பிரபலப்படுத்திய முன்னோடி இவராவார். இந்தியக் கடவுள்களின் உருவங்களைச் சாமானிய மக்களின் இல்லங்களுக்குக் கொண்டு சென்ற பெருமை இவரையே சாரும். 1894 ஆம் ஆண்டு இவர் தொடங்கிய லித்தோகிராஃபிக் பிரஸ், மலிவு விலையில் ஓவியப் பிரதிகளை அச்சிட்டு இந்தியக் கலாச்சாரத்தை நாடு முழுவதும் பரப்பியது. இவரது ஓவியங்கள் இன்றும் இந்தியக் கலை உலகின் விலைமதிப்பற்ற பொக்கிஷங்களாகக் கருதப்படுகின்றன.