சென்னை கோயம்பேடு மார்க்கெட்டில் காய்கறிகள் விலை உயர்வு
தமிழ்நாடு மாநிலம் சென்னை கோயம்பேடு மார்க்கெட்டில் ஒரு கிலோ இஞ்சியின் விலை ரூ.200 என்று விற்கப்படுவதாக தெரிகிறது. இதனை கேட்டு பொதுமக்கள் பெரும் அதிர்ச்சியில் உள்ளார்கள். இஞ்சி மட்டுமில்லை பீன்ஸ், எலுமிச்சம் பழம் உள்ளிட்டவைகளின் விலையும் கிடுகிடுவென உயர்ந்துள்ளது என்று கூறப்படுகிறது. சென்னையில் இயங்கி வரும் மொத்த விலை காய்கறி அங்காடிகளை கொண்ட கோயம்பேடு மார்க்கெட்டுக்கு தமிழகத்தில் பல்வேறு பகுதிகளில் இருந்தும், ஆந்திரா, கேரளா, கர்நாடகா போன்ற மாநிலங்களில் இருந்தும் தினமும் லாரிகள் மூலம் காய்கறிகள் வந்து இறங்குகிறது. இந்நிலையில் தற்போதுள்ள கோடை வெயிலின் தாக்கம் காரணமாகவும், காய்கறிகளின் வரத்து குறைவு காரணமாகவும் காய்கறிகளின் விலைகள் அதிகளவில் உயர்ந்துள்ளது.
கடந்த 2 ஆண்டுகளாக இஞ்சிக்கு போதுமானவிலை கிடைக்காததால் சாகுபடி நிறுத்தம்
மேற்கூறப்பட்ட காரணங்களால் இன்று காலை கோயம்பேடு மார்க்கெட்டில் ஒரு கிலோ இஞ்சியின் விலை ரூ.200க்கு விற்பனை செய்யப்பட்டுள்ளது. இதனைத்தொடர்ந்து ஒரு கிலோ பீன்ஸ், எலுமிச்சைப்பழங்கள் அனைத்தும் கிலோவுக்கு ரூ.120க்கு விற்பனை செய்யப்பட்டுள்ளது. சென்னை புறநகர் கடைகளில் ஒரு கிலோ இஞ்சி ரூ.300க்கும்,எலுமிச்சைப்பழங்கள் ரூ.170க்கும் விற்பனை செய்யப்படுகிறது. இந்நிலையில் இதுகுறித்து கோயம்பேடு காய்கறி மார்க்கெட் சிறு-மொத்த வியாபாரிகள் சங்கத்தலைவர் எஸ்.எஸ்.முத்துக்குமார் கூறுகையில், கோயம்பேடு மார்க்கெட்டில் கடந்த ஒருவார காலமாகவே இஞ்சி ஒரு கிலோ ரூ.200க்கும்,பீன்ஸ் ரூ.120க்கும் விற்பனை செய்யப்படுகிறது என்று கூறினார். இதுதொடர்பாக இஞ்சி வியாபாரி ஒருவர் கூறுகையில், கடந்த 2 ஆண்டுகளாக இஞ்சிக்கு போதுமானவிலை கிடைக்காததால் இஞ்சி சாகுபடியினை பல விவசாயிகள் நிறுத்திவிட்டார்கள். அதனால் தான் இஞ்சியின் வரத்து குறைந்துள்ளது என்று கூறினார்.
இந்த காலவரிசையைப் பகிரவும்