தமிழகத்தில் தனியார் நிறுவன பால், தயிர் விலை லிட்டருக்கு ரூ.2 அதிகரிப்பு
தமிழகத்தில் ஆவின் நிறுவன பாலோடு ஒப்பிட்டு பார்க்கையில் தனியார் நிறுவன பால் விலை ரூ.20 வரை அதிகமாக உள்ளது. இதனால் ஆவின் பாலுக்கு கடைகளில் தேவை அதிகமாக உள்ளது. எனினும் தனியார் நிறுவனங்கள் கடந்த ஆண்டு பாலின் விலையினை 4 முறை உயர்த்தியது. இதனையடுத்து தற்போது இந்தாண்டு துவக்கத்திலேயே தனியார் பால் நிறுவனங்கள் பால் மற்றும் தயிரின் விலையினை லிட்டருக்கு ரூ.2 உயர்த்தியுள்ளது. நேற்றே ஒரு நிறுவனம் இதுகுறித்து அறிவித்த நிலையில், இன்று முதல் 4 தனியார் பால் நிறுவனங்களின் விலையுயர்வு அமலுக்கு வருகிறது. இது குறித்த சுற்றறிக்கையினை பால் முகவர்களுக்கு தனியார் நிறுவனங்கள் அனுப்பியுள்ளது என்று கூறப்படுகிறது.
தமிழ்நாடு பால் முகவர்கள் தொழிலாளர்கள் நலச்சங்கம் கண்டனம்
அந்த அறிக்கையில் பால் கொள்முதல் விலை, உற்பத்திக்கான மூலப்பொருட்களின் விலை ஏற்றத்தால் பால் விலை அதிகரிக்கப்பட்டுள்ளது என்று குறிப்பிடப்பட்டுள்ளது. இந்த விலையுயர்வின் படி, பால் லிட்டருக்கு 2 ரூபாய் உயருகிறது என்று கூறியுள்ளதோடு, தயிரின் விலையும் லிட்டருக்கு ரூ.2 உயர்வதாக தெரிவிக்கப்பட்டுள்ளது. இதற்கு தமிழ்நாடு பால் முகவர்கள் தொழிலாளர்கள் நலச்சங்கம் கண்டனம் தெரிவித்துள்ளது. மேலும் இது குறித்து மத்திய இணை அமைச்சர் எல்.முருகன் அவர்களுக்கு சங்கம் சார்பில் ஓர் கடிதம் எழுதியுள்ளதாக கூறப்படுகிறது. அதில், 'தனியார் நிறுவனங்கள் பால் விலையினை தன்னிச்சையாக உயர்த்துவதை தடுக்க வேண்டும்' என்றும், 'பால் கொள்முதல் மற்றும் விற்பனை விலையை அரசு நிர்ணயிக்க நடவடிக்கை எடுக்க வேண்டும்' என்றும் கூறியுள்ளார்கள் என்பது குறிப்பிடத்தக்கது.
