சிவராத்திரி விழா முன்னிட்டு தஞ்சை பெரிய கோயிலில் முன்னேற்பாடுகள் தீவிரம்
மகாசிவராத்திரி விழா நாளை(பிப்.,18) மிக சிறப்பாக தமிழகம் முழுவதும் கொண்டாடப்படவுள்ள நிலையில், தஞ்சை பெரிய கோயிலில் அதற்கான முன்னேற்பாடுகள் தீவிரமாக நடைபெற்று வருகிறது. இந்த விழாவிற்கு அரசு அதிகாரிகள் உள்பட முக்கிய பிரமுகர்கள் வருகை தரும் நிலையில், மங்கல இசை, திருமுறை விண்ணப்பம், கயிலாய வாத்தியம், தெருக்கூத்து, நாதசங்கமம், பறை இசை, பக்திஇசை, பட்டிமன்றம், பரதநாட்டியம், கரகாட்டம், காவடி, பக்தி இசை பாடல்கள் போன்ற பல்வேறு கலைநிகழ்ச்சிகள் நடைபெறவுள்ளது. இதற்கான முன்னேற்பாடுகள் தஞ்சை திலகர் திடலில் தஞ்சாவூர் அரண்மனை தேவஸ்தானம் மேற்பார்வையில் மிக விமர்சையாக நடந்து வருகிறது. தஞ்சையில் உள்ள மத்திய அரசின் கலாச்சார அமைப்பான தென்னக பண்பாட்டு மையம் சார்பிலும் சிவராத்திரி அன்று கலைநிகழ்ச்சிகள் நடக்கவுள்ளது என்று செய்திகள் தெரிவிக்கிறது.
வரும் 18ம் தேதி முதல் 22ம் தேதி வரை தென்மாநில பாரம்பரிய நடன நிகழ்ச்சிகள்
இந்த தென்னக பண்பாட்டு மையம் என்பது தமிழகம், ஆந்திரா, தெலுங்கானா, கேரளா, புதுச்சேரி, லட்சத்தீவு, கர்நாடகா, அந்தமான்-நிக்கோபார் தீவுகள் ஆகியவற்றில் உள்ள கலைகளை மேம்படுத்தும் வகையில் அமைக்கப்பட்டுள்ளது. இந்தாண்டின் சிவராத்திரியன்று இந்த அமைப்பின் சார்பில் தஞ்சையை சுற்றியுள்ள சிவாலயங்களில் கலைநிகழ்ச்சிகள் நடைபெறவுள்ளது. அதற்கான ஏற்பாடுகள் செய்யப்பட்டு வருகிறது. வரும் 18ம் தேதி முதல் 22ம் தேதி வரை தஞ்சை பெரிய கோயிலில் பரதநாட்டியம், மோகினி ஆட்டம், கதகளி, குச்சிப்பிடி, போன்ற தென்மாநில பாரம்பரிய நடன நிகழ்ச்சிகள் நடைபெறவுள்ளது. மயிலாடுதுறை மயூரநாதர் மற்றும் திருவிடைமருதூர் மகாலிங்கேஸ்வரர் உள்ளிட்ட கோயில்களிலும் இந்த அமைப்பானது கலைஞர்களை கோயில் நிர்வாகத்துடன் இணைத்து கலை நிகழ்ச்சிகள் நடத்த திட்டமிட்டுள்ளதாக கூறப்படுகிறது.
