இந்து சமய அறநிலையத்துறை சார்பில் அமைச்சர் சேகர்பாபு சட்டசபையில் அறிவிப்பு
தமிழ்நாடு சட்டசபையில் இன்று(ஏப்ரல்.,19) அறநிலையத்துறை அமைச்சர் சேகர் பாபு சில புதிய அறிவிப்புகளை வெளியிட்டார். அவர் வெளியிட்ட அறிவிப்புகள் வருமாறு, ராமேஸ்வரம் திருக்கோயிலுக்கு அக்னி தீர்த்த படித்துறை உள்ளிட்ட அடிப்படை வசதிகளை மேம்படுத்த ரூ.50 கோடி அரசு மானியம் வழங்கப்படும். திருக்கோயில்களில் நடைபெறும் திருமணங்களில் மணமக்களில் ஒருவர் மாற்றுத்திறனாளியாக இருப்பின் அந்த திருமணத்திற்கு 4 கிராமில் பொன் தாலி திருக்கோயில் சார்பில் வழங்கப்படும். கிராமத்தெய்வங்களின் சுடுமண் சிற்பங்களை பாதுகாத்து சீரமைக்கும் பணி 6 திருக்கோயில்களில் ரூ.3கோடி மதிப்பீட்டில் செய்யப்படும். திருப்பைஞ்ஞீலி, பழையாறை, திண்டல் உள்ளிட்ட 15 திருக்கோயில்களில் ரூ.25.98 கோடி மதிப்பீட்டில் ராஜக்கோபுரங்கள் கட்டப்படும். 19 திருக்கோயில்களில் புதுத்தேர்கள் ரூ.11.83கோடியில் உருவாக்கப்படும். 53 திருக்கோயில்களில் ரூ.10.25கோடி செலவில் திருத்தேர் பாதுகாப்பு கொட்டகைகள் அமைக்கப்படும்.
மயிலாப்பூர் திருவள்ளுவர் திருக்கோயிலில் ரூ.15 கோடி மதிப்பீட்டில் திருப்பணிகள்
மேலும், 46 திருக்கோயில்களில் திருக்குளங்கள் ரூ.25.94 கோடி மதிப்பீட்டில் சீரமைக்கப்படும். ஓய்வுபெற்ற திருக்கோயில் பணியாளர்களுக்கு வழங்கப்படும் மாத ஓய்வூதியம் ரூ.3000லிருந்து ரூ.4,000ஆக உயர்த்தப்படும். குடும்ப ஓய்வூதியம் ரூ.1,500 லிருந்து ரூ.2,000 ஆக உயர்த்தி வழங்கப்படும். ஓலைச்சுவடிகள் மற்றும் மூலிகை ஓவியங்கள் ஆய்வு மையம் ரூ.5 கோடி மதிப்பீட்டில் சென்னை ஆணையர் அலுவலகத்தில் ஏற்படுத்தப்படும். பக்தர்களுக்காக பழனி-இடும்பன் மலை, அனுவாவி, திருக்கழுக்குன்றம், திருநீர்மலை ஆகிய மலை பகுதிகளில் அமைந்துள்ள 4 திருக்கோயில்களில் கம்பிவட ஊர்தி ரூ.66 கோடி மதிப்பில் அமைக்கப்படும். ஸ்வாமிமலை திருக்கோயிலில் பக்தர்கள் நலனுக்காக ரூ.3.50 கோடி மதிப்பீட்டில் மின்தூக்கி அமைக்கப்படும். மயிலாப்பூர் திருவள்ளுவர் திருக்கோயிலில் ரூ.15 கோடி மதிப்பீட்டில் திருப்பணிகள் மேற்கொள்ளப்படும் என்று பல அறிவிப்புகளை அவர் வெளியிட்டுள்ளது குறிப்பிடத்தக்கது.
