நீட் தேர்வு வினாத்தாள் கசிவு சர்ச்சை: மறுதேர்வு வினாத்தாள்களை விமானப்படை மூலம் கொண்டு செல்ல மத்திய அரசு திட்டம்
செய்தி முன்னோட்டம்
தேசிய அளவில் பெரும் அதிர்ச்சியை ஏற்படுத்திய நீட் தேர்வு வினாத்தாள் கசிவு சர்ச்சையைத் தொடர்ந்து, ஜூன் 21 மறுதேர்வு வினாத்தாள்களை அதீத பாதுகாப்புடன் கொண்டு சேர்க்க இந்திய விமானப்படையைப் பயன்படுத்த மத்திய அரசு பரிசீலித்து வருகிறது. புதுடெல்லியில் பாதுகாப்புத் துறை அமைச்சர் ராஜ்நாத் சிங் தலைமையில் நடைபெற்ற உயர்மட்டக் கூட்டத்தில் இத்திட்டம் குறித்து விரிவாக ஆலோசிக்கப்பட்டதாகப் பிடிஐ செய்தி நிறுவனம் தெரிவித்துள்ளது. இக்கூட்டத்தில மத்திய அமைச்சர்கள் தர்மேந்திர பிரதான், ஜோதிராதித்யா சிந்தியா மற்றும் தேர்வு முகமை அதிகாரிகள் கலந்துகொண்டனர். வினாத்தாள் தயாரிப்பு முதல் தேர்வு மையப் பாதுகாப்பு வரையிலான ஒட்டுமொத்த தேர்வுச் சங்கிலியையும் மறுஆய்வு செய்த அமைச்சர்கள், தரைவழிப் போக்குவரத்து பாதுகாப்பானது அல்ல என்பதால் ராணுவப் பாதுகாப்பைக் கோரியுள்ளனர்.
பிரதமர் மோடி கண்காணிப்பு
பிரதமர் நரேந்திர மோடியின் இறுதி ஒப்புதலுக்காகக் காத்திருக்கும் வினாத்தாள் விமானப் போக்குவரத்துத் திட்டம்
விமானப்படை விமானங்களை வினாத்தாள் போக்குவரத்திற்குப் பயன்படுத்துவது குறித்த ஆலோசனைகள் நடத்தப்பட்ட போதிலும், இதுகுறித்த இறுதி முடிவு இன்னும் எடுக்கப்படவில்லை. இந்த முக்கியப் பரிந்துரையானது இறுதி ஒப்புதலைப் பெறும் பொருட்டுத் தற்பொழுது பிரதமர் நரேந்திர மோடியின் பார்வைக்கு வைக்கப்படவுள்ளதாக அரசு வட்டாரங்கள் தெரிவிக்கின்றன. ஜூன் 21 நீட் மறுதேர்வுக்கான ஆயத்தப் பணிகளைப் பிரதமர் மோடி தனிப்பட்ட முறையில் தீவிரமாகக் கண்காணித்து வருவதுடன், ஒவ்வொரு விபரங்களையும் அதிகாரிகளிடம் கேட்டு வருகிறார். கடந்த மே 3 அன்று இந்தியா மற்றும் வெளிநாடுகளில் உள்ள 551 நகரங்களில் சுமார் 23 லட்சம் மாணவர்கள் எழுதிய முதன்மை நீட் தேர்வு, முறைகேடுகள் காரணமாக ரத்து செய்யப்பட்டது குறிப்பிடத்தக்கது.
சிபிஐ தீவிர விசாரணை
மே 3 நீட் தேர்வு முறைகேடு பின்னணியும் சிபிஐ அமைப்பால் நாடு முழுவதும் நடத்தப்பட்ட அதிரடிக் கைதுகளும்
கடந்த மே 3 இல் நீட் தேர்வு நடந்த நான்கு நாட்களுக்குப் பிறகு, மே 7 அன்று தேர்வில் முறைகேடுகள் நடந்ததாகத் தேசிய தேர்வு முகமைக்கு ரகசியத் தகவல்கள் கிடைத்தன. இந்தத் தகவல்கள் மத்திய புலனாய்வு அமைப்புகளுடன் பகிர்ந்து சரிபார்க்கப்பட்டதை அடுத்து, வினாத்தாள் கசிந்தது உறுதியானதால் மே 12 அன்று தேர்வு ரத்து செய்யப்பட்டு மறுதேர்வு அறிவிக்கப்பட்டது. இப்புகார் தொடர்பாக மத்திய கல்வித் துறை அளித்த புகாரின் அடிப்படையில், சிபிஐ அதிகாரிகள் வழக்குப் பதிவு செய்து தனிப்படைகளை அமைத்துத் தீவிர விசாரணையில் இறங்கினர். டெல்லி, புனே மற்றும் லாத்தூர் உள்ளிட்ட பல நகரங்களில் சிபிஐ நடத்திய அதிரடிச் சோதனையில் வினாத்தாள் கசிவின் மூலக் காரணி கண்டறியப்பட்டதுடன், இதுவரை 13 பேர் கைது செய்யப்பட்டுள்ளனர்.