நாசாவுடன் இணைந்து புதிய திட்டங்களை செயல்படுத்தவிருக்கும் இஸ்ரோ
செய்தி முன்னோட்டம்
அமெரிக்க அதிபர் ஜோ பைடனின் அழைப்பின் பேரில் மூன்று நாட்கள் சுற்றுப்பயணமாக அமெரிக்கா சென்றிருக்கிறார் இந்திய பிரதமர் மோடி.
இந்த சுற்றுப்பயணத்தின் போது இந்தியா மற்றும் அமெரிக்கா இடையே பல்வேறு ஒப்பந்தங்கள் கையெழுத்தாகும் என எதிர்பார்க்கப்பட்டது. அதேபோல், கடந்த இரண்டு நாட்களில் பாதுகாப்பு, தொழில்நுட்பம் மற்றும் முதலீடு என பல்வேறு ஒப்பந்தங்கள் கையெழுத்தாகியிருக்கின்றன.
இந்நிலையில், விண்வெளி திட்டங்கள் தொடர்பாகவும் இந்தியா மற்றும் அமெரிக்கா ஆகிய இரு நாடுகளும் இணைந்து செயல்படவிருப்பதாகத் தகவல் வெளியாகியிருக்கிறது.
மனிதர்களை உள்ளடக்கிய விண்வெளித் திட்டங்களை அமெரிக்காவின் நாசா மற்றும் இந்தியாவின் இஸ்ரோ ஆகிய விண்வெளி அமைப்புகள் இணைந்து செயல்படுத்தவிருப்பதாக அமெரிக்க நிர்வாக அதிகாரி ஒருவர் தெரிவித்திருக்கிறார்.
இஸ்ரோ
ஆர்டிமிஸ் அக்கார்ட்ஸில் கையெழுத்திட்ட இந்தியா:
அதே போல் ஆர்டிமிஸ் அக்கார்ட்ஸ் ஒப்பந்தத்திலும் இந்தியா கையெழுத்திட்டிருக்கிறது. விண்வெளியை பாதுகாப்பாகவும், பயனுள்ள வகையிலும் அனைத்தும் நாடுகளும் பகிர்ந்து பயன்படுத்தும் வகையில் இந்த ஆர்டிமிஸ் அக்கார்ட்ஸ் ஒப்பந்தம் உருவாக்கப்பட்டிருக்கிறது.
இந்த ஒப்பந்தத்தில் ஏற்கனவே அமெரிக்கா உட்பட 26 நாடுகள் கையெழுத்திட்டிருக்கும் நிலையில், இந்தியாவும் தற்போது கையெழுத்திட்டிருக்கிறது.
இந்த ஒப்பந்தத்தின் படி விண்வெளி ஆராய்ச்சியில் ஈடுபட்டிருக்கும் நாடுகள், அமைதியான முறையில் வெளிப்படைத்தன்மையுடன் ஆராய்ச்சிகளை மேற்கொள்ள வேண்டும் எனக் கேட்டுக் கொள்ளப்பட்டிருக்கிறது.
மேலும், சில நாடுகள் இணைந்து, விண்வெளியில் எந்த நாட்டு வீரர்கள் ஆபத்தில் இருந்தாலும் உதவ வேண்டும் என்பது உட்பட பல்வேறு குறிப்புகள் ஆர்டிமிஸ் அக்கார்ட்ஸ் ஒப்பந்தத்தில் இடம்பெற்றிருக்கின்றன.