இந்தியாவின் முதன்மையான பணக்காரரான முகேஷ் அம்பானிக்கு மின்னஞ்சல் மூலம் கொலை மிரட்டல்
செய்தி முன்னோட்டம்
இந்தியாவின் முதன்மையான பணக்காரரும், ரிலையன்ஸ் குழுமத்தின் தலைவருமான முகேஷ் அம்பானிக்கு மின்னஞ்சல்கள் மூலம் கொலை மிரட்டல் விடுக்கப்பட்டிருப்பதாத் தகவல் வெளியாகியிருக்கிறது.
முகேஷ் அம்பானி ரூ.400 கோடி கொடுக்க வேண்டும் என்றும், இல்லையென்றால் அவரைக் கொலை செய்து விடுவோம் என்றும் நேற்று (அக்டோபர் 30) பெறப்பட்ட அந்த மின்னஞ்சலில் குறிப்பிடப்பட்டிருக்கிறது.
இது கடந்த ஒரு வார காலத்திற்குள் முகேஷ் அம்பானிக்கு விடுக்கப்பட்டு வந்திருக்கும் மூன்றாவது கொலை மிரட்டல் மின்னஞ்சலாகும்.
முன்னதாக, சில தினங்களுக்கு முன்பு ரூ.20 கோடி மற்றும் ரூ.200 கோடி கேட்டும் கொலை மிரட்டல் மின்னஞ்சல்கள் பெறப்பட்டிருப்பது குறிப்பிடத்தக்கது.
முகேஷ் அம்பானி
பலப்படுத்தப்பட்ட பாதுகாப்பு:
முதலில் ரூ.20 கோடி கேட்டே கொலை மிரட்டல் மின்னஞ்சல் பெறப்பட்டிருக்கிறது. அதற்கு முகேஷ் அம்பானி தரப்பிலிருந்து எந்த பதிலும் அளிக்கப்படாததையடுத்து ரூ.200 மற்றும் ரூ.400 கோடி கேட்டு மேலும் இரண்டு கொலை மிரட்டல் மின்னஞ்சல்களை அனுப்பியிருக்கின்றனர்.
இந்த கொலை மிரட்டல்களைத் தொடர்ந்து முகேஷ் அம்பானியின் வீட்டிற்கு பாதகாப்பு பலப்படுத்தப்பட்டிருக்கிறது.
மிரட்டல் விடுப்பதற்காக பெறப்பட்ட மின்னஞ்சலில், "போலீசாரால் என்னை ட்ராக் செய்து கைது செய்ய முடியாது. எவ்வளவு பலமான பாதுகாப்பு இருந்தாலும், எங்கள் ஸ்னைப்பர்களால் உங்களை கொலை செய்ய முடியும்" எனவும் குறிப்பிடப்பட்டிருக்கிறது.
இந்த சம்பவங்களையடுத்து, முகேஷ் அம்பானியின் பாதுகாப்பாளர் அளித்த புகாரின் பேரில், ஐபிசி பிரவு 387 மற்றும் 506(2)-ன் கீழ் வழக்கு பதிவு செய்து நடவடிக்கை எடுக்கப்பட்டு வருகிறது.