கர்நாடக அமைச்சர் நாகராஜூவின் சொத்து மதிப்பு 1,609 கோடி ரூபாய்
நாட்டின் பணக்கார அரசியல்வாதிகளில் ஒருவராகக் கருதப்படும் கர்நாடக அமைச்சர் என்.நாகராஜு (எம்டிபி), கர்நாடகாவில் மே 10 ஆம் தேதி நடைபெற இருக்கும் சட்டமன்றத் தேர்தலுக்கான வேட்புமனுவை தாக்கல் செய்யும் போது தனது மொத்த சொத்து மதிப்பு ரூ 1,609 கோடி என்று அறிவித்தார். பெங்களூருவின் புறநகரில் உள்ள ஹோஸ்கோட் சட்டமன்றப் பிரிவின் பாஜக வேட்பாளராக அவர் ஆவணங்களை தாக்கல் செய்தார். தனது தேர்தல் பிரமாணப் பத்திரத்தில், விவசாயம் மற்றும் வணிகம் என்று தனது தொழிலைக் குறிப்பிட்டுள்ள நாகராஜு, தனது மனைவி எம்.சாந்தகுமாரியுடன் சேர்ந்து ரூ.536 கோடி மதிப்பிலான அசையும் சொத்துக்களை வைத்துள்ளார். தம்பதியினரின் அசையா சொத்து மதிப்பு ரூ.1,073 கோடி ஆகும்.
தம்பதியினரின் மொத்த கடன்கள் ரூ.98.36 கோடி
ஜூன் 2020ல், சட்டப் பேரவைத் தேர்தலில் போட்டியிடும் போது, தனது மனைவியுடன் சேர்ந்து, சுமார் ரூ.1,220 கோடி மதிப்பிலான சொத்துகள் இருப்பதாக அறிவித்திருந்தார். வேட்புமனுவுடன் இன்று தாக்கல் செய்யப்பட்ட பிரமாணப் பத்திரத்தில், தம்பதியினர் தங்களுக்கு இருக்கும் மொத்த கடன்கள் ரூ.98.36 கோடி என அறிவித்துள்ளனர். 9-ம் வகுப்பு வரை படித்த நாகராஜு (72) என்பவர் விவசாயம், வீட்டு சொத்து, வியாபாரம் மற்றும் பிற ஆதாரங்கள் மூலம் தனக்கு வருமானம் வருவதாக விவரித்துள்ளார். 2018 சட்டமன்றத் தேர்தலில் காங்கிரஸ் கட்சி வேட்பாளராக ஹோஸ்கோட் சட்டமன்றத் தொகுதியில் நாகராஜு வெற்றி பெற்றார். 2019இல் காங்கிரஸ்-ஜனதா தளம்(எஸ்) கூட்டணி ஆட்சி கவிழ்வதற்கு காரணமாக இருந்த 17 எம்எல்ஏக்களில் இவரும் ஒருவர்.
