மம்தாவுடன் சந்திப்பு: இந்தியா கூட்டணி பேரணியில் பங்கேற்க மாட்டோம் என சிஜேபி அறிவிப்பு
செய்தி முன்னோட்டம்
மேற்கு வங்க முன்னாள் முதல்வரும் திரிணாமுல் காங்கிரஸ் தலைவருமான மம்தா பானர்ஜியை சனிக்கிழமை நேரில் சந்தித்துப் பேசிய 'காக்ரோச் ஜனதா கட்சி' நிறுவனர் அபிஜீத் திப்கே, டெல்லி ராம்லீலா மைதானத்தில் 'இந்தியா' கூட்டணி முன்னெடுக்கும் மாபெரும் பேரணிக்கு முழு ஆதரவைத் தெரிவித்துள்ளார். அதேநேரத்தில் தங்களது அமைப்பின் சுயேச்சையான, அரசியல் நடுநிலைத் தன்மையைப் பாதுகாக்கும் பொருட்டு இப்பேரணியில் தாங்கள் நேரடியாக பங்கேற்கப் போவதில்லை என்றும் தெளிவுபடுத்தியுள்ளார்.
நன்றி
நீட் போராட்ட ஆதரவிற்கு நன்றி
நீட் வினாத்தாள் கசிவு விவகாரத்தில் டெல்லி ஜந்தர் மந்தரில் இளைஞர்கள் முன்னெடுத்த முதல் போராட்டத்தின் போது தங்களுக்கு ஆதரவளித்ததற்கும், சிஜேபி தலைவர்கள் சௌரவ் தாஸ் மற்றும் அசுதோஷ் ரான்கா ஆகியோர் டெல்லி காவல்துறையினரால் கைது செய்யப்பட்டபோது தங்களுக்குத் துணை நின்றதற்கும் நன்றி தெரிவிக்க மம்தாவை சந்தித்ததாக அபிஜீத் தெரிவித்தார்.
இதுகுறித்து திப்கே கூறுகையில், "நாங்கள் நாளைய போராட்டத்தை முழுமையாக ஆதரிக்கிறோம், அதனுடன் ஒருமைப்பாட்டுடன் நிற்கிறோம்."
"காக்ரோச் ஜனதா கட்சி ஒரு சுதந்திரமான அமைப்பு மற்றும் நடுநிலையான தளம். அந்த அடையாளத்தை எப்போதுமே தக்கவைக்கவே நாங்கள் விரும்புகிறோம்."
"அரசியல் சார்புகளைக் கடந்து 'வாக்குத் திருட்டு' மற்றும் தேர்தல் முறைகேடுகளுக்கு எதிராகப் போராடும் அனைத்து அமைப்புகளுக்கும் எங்கள் தார்மீக ஆதரவு எப்போதும் உண்டு" என்று குறிப்பிட்டார்.
அழைப்பு
மேற்கு வங்கத்திற்கு மம்தா அழைப்பு
இளைஞர்களின் இந்த விழிப்புணர்வுப் போராட்டங்களைப் பாராட்டிய மம்தா பானர்ஜி, வாக்காளர் பட்டியல் தீவிர திருத்தம் (SIR) மற்றும் தேர்தல் ஆணையத்திற்கு எதிரான இளைஞர்களின் செயல்பாடுகளை வெகுவாகப் பாராட்டினார்.
"நாளைய பேரணிக்கு அவர்கள் தங்களது முழு ஆதரவை வழங்கியுள்ளனர்; நாங்களும் அவர்களுக்கு முழு ஆதரவை அளிக்கிறோம்."
"இந்த விழிப்புணர்வு இயக்கத்தின் முன்னோடிகளாகத் திகழும் இளைஞர்களை நினைத்துப் பெருமைப்படுகிறேன்" என்று கூறிய அவர், மேற்கு வங்காளத்திற்கு வருகை தந்து நிகழ்ச்சிகளை ஒருங்கிணைக்குமாறு சிஜேபி நிர்வாகிகளுக்கு அழைப்பு விடுத்தார்.
பேரணி
ராம்லீலா மைதானத்தில் எதிர்க்கட்சிகள் பேரணி
தலைமைத் தேர்தல் ஆணையர் ஞானேஷ் குமார் பதவி விலக வேண்டும் என்றும், தேர்தல் முறைகேடுகளுக்குத் தேர்தல் ஆணையம் பொறுப்பேற்க வேண்டும் என்றும் வலியுறுத்தி, ராம்லீலா மைதானத்தில் 'இந்தியா' கூட்டணி இன்று பிரம்மாண்ட பேரணியை நடத்துகிறது.
மின்டோ ரோடு - கன்னாட் பிளேஸ் சந்திப்பிலிருந்து ராம்லீலா மைதானம் வரை 'சலோ தில்லி' என்ற பெயரில் பேரணியும், தொடர்ந்து பொதுக்கூட்டமும் திட்டமிடப்பட்டுள்ளது.
நாடு முழுவதிலுமிருந்து எதிர்க்கட்சித் தலைவர்கள், மாணவர் இயக்கங்கள் மற்றும் சமூக அமைப்புகள் இதில் திரண்டு வரும் வேளையில், தங்களது இயக்கத்தின் நடுநிலைத் தன்மையைக் காக்க காக்ரோச் ஜனதா கட்சி மேடையைப் பகிர்வதைத் தவிர்த்துள்ளது.