ரசிகரின் டி-ஷர்ட்டில் ஆட்டோகிராஃப் போடும் எம்.எஸ்.தோனி - வைரல் வீடியோ
இந்திய கிரிக்கெட் அணியின் முன்னாள் கேப்டன் எம்.எஸ். தோனி தன்னுடைய ரசிகர் ஒருவருக்கு டி-ஷர்ட்டில் கையெழுத்து போடும் வீடியோ ஒன்று தற்போது இணையத்தில் வைரலாகி வருகிறது. இந்திய அணியின் முன்னாள் கேப்டன் எம்.எஸ். தோனிக்கு ஏராளமான ரசிகர்கள் உள்ளனர். இந்திய அணிக்கு ஒருநாள் உலகக்கோப்பை, டி20 உலகக்கோப்பை மற்றும் சாம்பியன்ஸ் டிராஃபி ஆகிய அனைத்து கோப்பைகளையும் வென்று கொடுத்தவர் தோனி. ரசிகர்கள் மத்தியில் செல்லமாக 'தல' என்று அழைக்கப்படும் இவர் கடந்த 2019-ம் ஆண்டு ஒருநாள் உலகக்கோப்பைக்கு பிறகு சர்வதேச போட்டிகளிலிருந்து ஓய்வு பெற்றார்.
சென்னை அணியை வழிநடத்தும் தோனி
அதன் பின்னர் ஐ.பி.எல். போட்டிகளில் மட்டும் விளையாடி வந்த இவர் தற்போது 2023 ஆம் ஆண்டு ஐ.பி.எல். போட்டியில் சென்னை அணியை வழிநடத்துவார் என்றும் சென்னை அணியின் கேப்டனாக தோனி நீடிப்பார் என்றும் சென்னை அணியின் தலைமை செயல் அதிகாரி கே.எஸ்.விஸ்வநாதன் சமீபத்தில் ஓர் அறிவிப்பினை வெளியிட்டுள்ளார். இந்நிலையில் தன்னுடைய ஓய்வு நேரங்களில் தனது சொந்த வாழ்வில் கவனம் செலுத்தி வரும் தோனியின் வீடியோக்கள் அவ்வப்போது இணையத்தில் வைரலாவது வழக்கம். அதன்படி, தற்போது தோனி தனது ரசிகர் ஒருவரின் முதுகில் அவரது டி-ஷர்ட்டில் ஆட்டோகிராஃப் போடும் வீடியோ இணையத்தில் பெருமளவில் பகிரப்பட்டு வைரலாகி வருகிறது.
