கலைஞர் மகளிர் உரிமை தொகை திட்டம் - விண்ணப்பங்கள் சரிபார்க்கும் பணி தீவிரம்
செய்தி முன்னோட்டம்
தமிழக முதல்வர் மு.க.ஸ்டாலின், வரும் செப்டம்பர் 15ம் தேதி கலைஞர் மகளிர் உரிமை தொகை திட்டம் செயல்படுத்தப்படும் என்று முன்னதாக அறிவித்திருந்தார்.
இந்த திட்டத்தில் பயனடைய தகுதியானோரை தேர்வு செய்வதற்கான பணிகளை தமிழக அரசு மேற்கொண்ட நிலையில் இதற்கான விண்ணப்பங்களை பெற தமிழ்நாடு முழுவதும் முகாம்கள் நடத்தப்பட்டது.
சென்னையில் மட்டும் 17.18 லட்சம் பேர் விண்ணப்பித்துள்ளனர் என்று தகவல்கள் தெரிவிக்கிறது.
அதனை தொடர்ந்து, 2 கட்டங்களாக நடத்தப்பட்ட முகாம்களில், முதற்கட்டம் மற்றும் 2ம் கட்டம் என இரண்டும் சேர்த்து 1 கோடி 54 லட்சம் பேர் விண்ணப்பித்திருந்த நிலையில், விண்ணப்பிக்க தவறியவர்களுக்காக நடத்தப்பட்ட 3ம் கட்ட சிறப்பு முகாம்கள் நடத்தப்பட்டது.
மகளிர் திட்டம்
கல்வித்துறை ஊழியர்களும், தன்னார்வலர்களும் இப்பணியில் ஈடுபட்டுள்ளனர்
அதன்படி, மொத்தம் தமிழ்நாடு முழுவதும் 1 கோடியே 63 லட்சம் பேர் இத்திட்டத்திற்காக விண்ணப்பித்துள்ளனர்.
பதிவு செய்யப்பட்ட இந்த விண்ணப்பங்கள் அனைத்தும் அரசிடமுள்ள ஆதார் எண் விவரங்கள், மின்கட்டண தரவுகள், வருமான வரித்துறை உள்ளிட்டவைகளை அடிப்படையாக கொண்டு சரிபார்க்கப்படவுள்ளதாக தகவல்கள் வெளியானது.
இந்நிலையில் தற்போது வீடு வீடாக சென்று இந்த விண்ணப்பங்களை சரிபார்க்கும் பணி துவங்கியுள்ளது என்று தெரிகிறது.
கல்வித்துறை ஊழியர்களும், இத்திட்டத்திற்கான தன்னார்வலர்களும் இப்பணியில் ஈடுபடுத்தப்பட்டுள்ளனர்.
மக்களிடம் இருந்து பெறப்பட்டுள்ள விண்ணப்பங்களில் கொடுக்கப்பட்டுள்ள விவரங்கள் அனைத்தும் உண்மைத்தன்மை கொண்டது தானா?என்பதை இந்த ஊழியர்கள் ஆய்வு செய்வர்.
இம்மாத இறுதிக்குள் இறுதி பட்டியல் அரசிடம் ஒப்படைக்க வேண்டும் என்பதால் சரிபார்க்கும் பணி தீவிரப்படுத்தப்பட்டுள்ளது என்பது குறிப்பிடத்தக்கது.