வணிக நிறுவனத்தின் பெயர் கொண்ட முதல் ரயில்! லக்னோ - டெல்லி தேஜஸ் எக்ஸ்பிரஸுக்கு வந்த புதிய பெயர்
செய்தி முன்னோட்டம்
இந்திய ரயில்வே வரலாற்றில் முதன்முறையாக வணிக நிறுவனம் ஒன்றின் பெயரை அதிகாரப்பூர்வமாகத் தாங்கி இயங்கும் முதல் ரயிலாக லக்னோ - டெல்லி தேஜஸ் எக்ஸ்பிரஸ் உருவெடுத்துள்ளது. ஐஆர்சிடிசி மூலம் இயக்கப்படும் இரயில் எண் 82501/82502 தேஜஸ் எக்ஸ்பிரஸ், 2026 ஆகஸ்ட் 19 முதல் நவம்பர் 11 வரை ஸ்பிரைட் தேஜஸ் எக்ஸ்பிரஸ் என்ற பெயருடன் அழைக்கப்படும் என அறிவிக்கப்பட்டுள்ளது. ரயில் நிலையங்கள் மற்றும் ஒலிபெருக்கிகளில் இந்தப் புதிய பிராண்டட் பெயரிலேயே ரயில் அறிவிக்கப்படும்.
விளம்பர ஒப்பந்தம்
6 மாத விளம்பர ஒப்பந்தமும் ஒலிபெருக்கி அறிவிப்பும்
ரயில்வே சொத்துக்கள் மற்றும் பெட்டிகளில் விளம்பரம் செய்வதற்கு பதிலாக, வணிக நிறுவனத்தின் பெயரை ரயிலின் பெயராகவே பயன்படுத்தி அறிவிப்பது இதுவே முதல்முறையாகும்.
ஐஆர்சிடிசி வழங்கிய 6 மாதக் கால விளம்பர உரிமத்தின்படி, வடகிழக்கு ரயில்வே எல்லைக்குட்பட்ட அனைத்து தொடக்க மற்றும் வழிநெடுகிலும் உள்ள ரயில் நிலையங்களில் இனி ஸ்பிரைட் தேஜஸ் எக்ஸ்பிரஸ் என்றே முறைப்படி அழைக்கப்படும்.
எனினும், ரயிலின் சேவை மற்றும் நிர்வாகத்தில் எந்தவித மாற்றமும் இருக்காது.
தனியார் ரயில்
தேஜஸ் எக்ஸ்பிரஸ் தனியார் ரயிலா?
2019இல் அறிமுகப்படுத்தப்பட்ட லக்னோ - டெல்லி தேஜஸ் எக்ஸ்பிரஸ், இந்திய ரயில்வேக்கு பதிலாக ஐஆர்சிடிசியால் இயக்கப்படுவதால் நாட்டின் முதல் தனியார் ரயில் எனக் குறிப்பிடப்படுகிறது.
இருப்பினும், ரயில் தண்டவாளங்கள் மற்றும் ரயில் நிலையங்கள் போன்ற உள்கட்டமைப்புகள் இந்திய ரயில்வேக்கே சொந்தமானவை.
அதற்காக குறிப்பிட்ட தொகையை ஐஆர்சிடிசி ரயில்வேக்கு செலுத்துகிறது.
தற்போது செய்யப்பட்டுள்ள ஒப்பந்தம் வெறும் விளம்பர நோக்கத்திற்காக மட்டுமே தவிர தனியார் நிறுவனம் ரயிலை இயக்காது.
வசதிகள்
சொகுசு வசதிகள் மற்றும் நவீன சேவைகள்
முழுவதும் ஏசி வசதி கொண்ட இந்த நவீன ரயிலில், சுவையான உணவுகள் மற்றும் பொழுதுபோக்குத் திரைகள் உள்ளிட்ட பல்வேறு பிரீமியம் சேவைகள் வழங்கப்படுகின்றன.
நிறுவன நிகழ்வுகள், திருமணங்கள் மற்றும் சிறப்பு குழுப் பயணங்களுக்காக 78 ஆசனங்கள் கொண்ட ஒரு முழு ஏசி சேர் கார் பெட்டியையே பயணிகள் முன்பதிவு செய்யும் வசதியும் ஐஆர்சிடிசி மூலம் வழங்கப்படுகிறது.