சீனா ஏன் அருணாச்சலின் தவாங்கை குறி வைக்கிறது?
அருணாச்சல் மாநிலத்தை சேர்ந்த தவாங் என்ற பகுதியை கைப்பற்ற கிட்டத்தட்ட 300 சீனப் படையினர் அத்துமீறி கடந்த 9-ம் தேதி இந்திய எல்லைக்குள் நுழைந்தனர். இவர்களை இந்திய ராணுவத்தினர் 50 பேர் அடித்து விரட்டி இருக்கின்றனர். 9ஆம் தேதி நடந்த இந்த மோதலின் போது எடுக்கப்பட்ட வீடியோ காட்சி ஒன்று தற்போது இணையத்தில் வைரலாகி கொண்டிருக்கிறது. 4 நாட்களுக்கு பின்பு தான் இந்த தகவலை இந்திய ராணுவம் வெளி உலகிற்குத் தெரிவித்தது. இது குறித்து நாடாளுமனறத்தில் விளக்கம் அளித்த பாதுகாப்புதுறை அமைச்சர் ராஜ்நாத் சிங், இந்திய பகுதிக்குள் அத்துமீறி நுழைந்த சீன ராணுவத்தை இந்திய ராணுவம் அடித்து விரட்டியதாகக் கூறி இருக்கிறார். சீனாவின் இந்த செயலுக்கு பல்வேறு தரப்பினர் கண்டனம் தெரிவித்துள்ளனர்.
அப்படி தவாங்கில் என்னதான் இருக்கிறது?
அருணாச்சலில் இருக்கும் தவாங் என்னும் இடத்தை ஏன் சீனா குறி வைக்க வேண்டும்? இந்த பகுதி கடல் மட்டத்தில் இருந்து சுமார் 17 ஆயிரம் அடி உயரத்தில் அமைந்துள்ளது. இந்த இடத்தில் இருந்து அருணாச்சல பிரதேசத்தை மட்டுமில்லாமல், மொத்த திபெத்தையும் கண்காணிக்கலாம். மேலும், இங்கு தான் சீனா-பூடான் எல்லையும் அமைந்திருக்கிறது. இந்த பகுதிகளில் பிரமாண்டமான புத்த மடாலயமும் அமைத்திருக்கிறதாம். திபெத் புத்த மதத் தலைவர் தலாய் லாமா இதற்கு முன் இந்த தவாங் பகுதியில் தங்கி சென்றிருக்கிறார். அதுபோக, நயாகரா நீர்வீழ்ச்சிக்கு நிகரான 108 புனித நீர்வீழ்ச்சிகள் இங்கு இருக்கிறது. அதிக நிலப்பரப்பு கொண்ட நாடுகளில் மூன்றாம் இடத்தில் இருக்கும் சீனாவின் 43% நிலப்பரப்புகள் ஆக்கிரமிப்புகளால் கிடைத்தவை என்பது குறிப்பிடப்பதக்கது.
