தமிழகத்தில் மீண்டும் கொரோனா தொற்று அதிகரிப்பு - மா.சுப்ரமணியம் எச்சரிக்கை
செய்தி முன்னோட்டம்
தமிழ்நாட்டில் இன்ஃப்ளூயன்சா ஏ என்னும் வைரஸ் தொற்றால் காய்ச்சல் ஏற்பட்டு பாதிக்கப்படுவோர் எண்ணிக்கை அதிகரித்து வருகிறது. இதனை தடுக்கும் முன்னெச்சரிக்கை நடவடிக்கையாக தமிழகத்தில் மட்டும் 1000 இடங்களில் காய்ச்சல் முகாம்கள் அமைத்து நடத்தப்பட்டு வருகிறது. சென்னை மாநகராட்சியில் மட்டும் 200இடங்களில் காய்ச்சல் முகாம் நடக்கிறது. அந்தவகையில் சென்னை சைதாப்பேட்டை காய்ச்சல் தடுப்பு முகாமினை தமிழக சுகாதாரத்துறை அமைச்சர் மா.சுப்ரமணியம் தொடங்கி வைத்துள்ளார். அப்போது பேசியஅவர், இந்த முகாம்கள் மூலம் தமிழகத்தில் எத்தனைபேர் இந்த எச்3என்2 என்னும் வைரஸ் காய்ச்சலால் பாதிக்கப்பட்டுள்ளார்கள் என்பதை கண்டறியலாம். அதன் பின்னர் இதனால் பாதிக்கப்பட்டோருக்கு உரிய சிகிச்சை வழங்க ஏற்பாடுகள் செய்யப்பட்டுள்ளது. இந்த வைரஸ் சமூக பரவல் தொற்றாக மாறும் முன்னரே இதனை கட்டுப்படுத்தவே இத்தகைய நடவடிக்கைகள் மேற்கொள்ளப்பட்டுள்ளது.
அமைச்சர் பேட்டி
கொரோனா தடுப்பு விதிமுறைகளை பின்பற்றினாலே இன்ஃப்ளூயன்சா ஏ வைரஸ் தொற்றிலிருந்து தற்காத்துக்கொள்ளலாம்
எனவே, பொதுமக்கள் அச்சப்பட வேண்டாம் என்று கூறியுளளார். தொடர்ந்து பேசிய அவர், தமிழ்நாடு உள்பட நாடு முழுவதும் ஒமைக்ரான் வகை கொரோனா பாதிப்பு அதிகரித்து வருகிறது என்று தெரிவித்தார். ஒரு மாதத்துக்கு முன்னர் 2 பேருக்கு மட்டுமே இருந்த கொரோனா பாதிப்பு தற்போது 20 பேருக்கு மேலாக அதிகரித்துள்ளது. எனினும் இந்த வகை கொரோனா வைரஸால் பெரியளவில் பாதிப்பு ஏற்படுவதில்லை. அதனால் மக்கள் பதட்டம் அடைய தேவையில்லை. பொது இடங்களில் முகக்கவசம் அணிதல், தனிமனித இடைவெளி, போன்றவற்றை பின்பற்றினால் நல்லது என்று அறிவுறுத்தியுள்ளார். மேலும், கொரோனா தடுப்பு விதிமுறைகளை பின்பற்றினாலே தற்போது பரவி வரும் இன்ஃப்ளூயன்சா ஏ என்னும் வைரஸ் தொற்றில் இருந்து தற்காத்து கொள்ள முடியும் என்றும் அவர் கூறியது குறிப்பிடத்தக்கது.