ஜி20 மாநாட்டில் பிரதமர் மோடி பேசியது என்ன: பிரதமர் உரையின் சுருக்கம்
புது டெல்லியின் பிரகதி மைதானத்தில் இன்று(செப் 9) நடைபெற்று வரும் ஜி20 மாநாட்டில் பிரதமர் நரேந்திர மோடி உரையாற்றினார். உலக தலைவர்கள் கூடி இருக்கும் ஜி20 உச்சி மாநாட்டில் பிரதமர் நரேந்திர மோடியின் இருக்கைக்கு முன் 'இந்தியா' என்பதற்கு பதிலாக 'பாரத்' என்ற பெயர்ப்பலகை வைக்கப்பட்டுள்ளது. பிரதமர் நரேந்திர மோடியின் வரவேற்பு உரையுடன் ஜி20 மாநாடு தொடங்கியது. " மொராக்கோ நிலநடுக்கத்தில் காயமடைந்த அனைவரும் விரைவில் குணமடைய நாங்கள் பிரார்த்திக்கிறோம். இந்த கடினமான நேரத்தில் மொராக்கோவிற்கு அனைத்து உதவிகளையும் செய்ய இந்தியா தயாராக உள்ளது," என்று மொராக்கோ நிலநடுக்கம் குறித்து பேசி தன் உரையை தொடங்கினார் பிரதமர் மோடி.
பிரதமர் நரேந்திர மோடி உரையின் சுருக்கம்:
COVID-19க்குப் பிறகு, உலகில் நம்பிக்கை பற்றாக்குறை ஏற்பட்டுள்ளது. (உக்ரைன்)போர் இந்த நம்பிக்கைப் பற்றாக்குறையை ஆழமாக்கியுள்ளது. கோவிட்-ஐ தோற்கடிக்க முடிந்த நம்மால், இந்த நம்பிக்கை பற்றாக்குறை நெருக்கடியிலும் வெற்றி காண முடியும். பழைய பிரச்சனைகளுக்கு புதிய தீர்வுகளை காணும் காலங்களில் நாம் வாழ்கிறோம்.மனித இனத்தை மையமாக கொண்டு நமது பொறுப்புகளை நாம் நிறைவேற்ற வேண்டும். ஜி 20 தலைவர் என்ற முறையில், நம்பிக்கை பற்றாக்குறையை நம்பிக்கையாக மாற்றுமாறு இந்தியா முழு உலகையும் கேட்டுக்கொள்கிறது. உலக நன்மைக்காக நாம் அனைவரும் ஒன்றுபட்டு நடக்க வேண்டிய நேரம் இது. ஆப்பிரிக்க யூனியனை(AU) நிரந்தர ஜி20 உறுப்பினராக்க இந்தியா முன்வருகிறது. அனைத்து உறுப்பினர்களும் இந்த முன்மொழிவை ஏற்றுக்கொள்வார்கள் என்று நான் நம்புகிறேன்.
இந்த காலவரிசையைப் பகிரவும்