LPG சிலிண்டர் தட்டுப்பாட்டை வைத்து நூதன மோசடி: மத்திய அரசு அதிரடி எச்சரிக்கை!
செய்தி முன்னோட்டம்
மத்திய கிழக்கு போரின் எதிரொலியால் இந்தியாவில் நிலவும் எல்பிஜி (LPG) சமையல் எரிவாயு தட்டுப்பாட்டைச் சாதகமாக்கிக் கொண்டு, நாடு முழுவதும் புதிய வகை சைபர் மோசடிகள் அதிகரித்து வருவதாக இந்திய சைபர் குற்ற ஒருங்கிணைப்பு மையம் (I4C) எச்சரிக்கை விடுத்துள்ளது. எரிவாயு தட்டுப்பாடு குறித்த பொதுமக்களின் அச்சத்தைப் பயன்படுத்தி, மர்ம நபர்கள் பணத்தைப் பறிக்க முயல்வதால், சிலிண்டர் முன்பதிவு செய்யும் போது கூடுதல் கவனத்துடன் இருக்குமாறு அறிவுறுத்தப்பட்டுள்ளது.
மோசடி
எவ்வாறு நடைபெறுகிறது இந்த LPG மோசடி?
மோசடி செய்பவர்கள் வாடிக்கையாளர்களுக்கு எஸ்எம்எஸ், வாட்ஸ்அப் அல்லது சமூக வலைதளங்கள் வாயிலாகக் கவர்ச்சிகரமான செய்திகளை அனுப்புகின்றனர். "எரிவாயு தட்டுப்பாடு காரணமாக உடனடியாக முன்பதிவு செய்யவும்" அல்லது "குறைந்த விலையில் சிலிண்டர் பெற இங்கே கிளிக் செய்யவும்" என்ற வாசகங்களுடன் லிங்குகளை (Links) அனுப்புகின்றனர். பயனர்கள் அந்த லிங்கை கிளிக் செய்யும்போது, அது அதிகாரப்பூர்வ தளம் போலவே தோற்றமளிக்கும் ஒரு போலி இணையதளத்திற்கு அழைத்துச் செல்லும். அங்கே பணம் செலுத்துவதற்காக கியூஆர் கோடு (QR Code) ஸ்கேன் செய்யவோ அல்லது செயலிகளைப் பதிவிறக்கம் செய்யவோ வற்புறுத்தப்படுவார்கள். இதன் மூலம் பயனர்களின் வங்கி விவரங்கள் மற்றும் ஓடிபி (OTP) எண்களைத் திருடி, அவர்களின் கணக்கில் உள்ள பணத்தை மோசடி கும்பல் அபகரிக்கிறது.
அறிகுறி
மோசடியை கண்டறிய உதவும் முக்கிய அறிகுறிகள்
பொதுமக்கள் தங்களைப் பாதுகாத்துக்கொள்ளப் பின்வரும் எச்சரிக்கை அறிகுறிகளைக் கவனத்தில் கொள்ள வேண்டும்: சிலிண்டர் தட்டுப்பாட்டைக் காரணம் காட்டி, அவசரமாகப் பணம் செலுத்தக் கோரும் குறுஞ்செய்திகள். அதிகாரப்பூர்வமற்ற இணையதளங்களுக்கு அழைத்துச் செல்லும் சந்தேகத்திற்குரிய லிங்குகளைப் பகிர்தல். கூகுள் பிளே ஸ்டோர் அல்லாத பிற இடங்களிலிருந்து 'APK' கோப்புகளைப் பதிவிறக்கம் செய்யக் கோருதல். முன்பதிவு செய்வதற்கு வங்கி ரகசிய எண்கள் (PIN) அல்லது ஓடிபி (OTP) விவரங்களை கேட்டல். இத்தகைய நுட்பங்கள் அனைத்தும் பயனர்களைப் பதற்றமடையச் செய்து, நிதானமாகச் சிந்திக்கும் முன் அவர்களைச் செயல்பட வைப்பதற்காகப் பயன்படுத்தப்படுகின்றன.
வழிகாட்டுதல்கள்
பாதுகாப்பாக இருப்பது எப்படி? வழிகாட்டுதல்கள்
சைபர் தோஸ்த் தளம் வாயிலாக அரசு வழங்கியுள்ள பாதுகாப்பு ஆலோசனைகள் இதோ: 1. அதிகாரப்பூர்வ செயலிகள்: எல்பிஜி சிலிண்டர்களை எப்போதும் அந்தந்த நிறுவனங்களின்(Indane, HP, Bharat Gas) அதிகாரப்பூர்வ செயலிகள் அல்லது இணையதளங்கள் மூலம் மட்டுமே முன்பதிவு செய்யவும். 2. தெரியாத லிங்குகளைத் தவிர்க்கவும்: அறிமுகமில்லாத எண்களில் இருந்து வரும் லிங்குகளை எக்காரணம் கொண்டும் கிளிக் செய்ய வேண்டாம். 3. ரகசியத் தகவல்கள்: உங்கள் வங்கி கணக்கு விவரங்கள், பின் நம்பர் அல்லது ஓடிபி ஆகியவற்றை யாரிடமும் பகிர வேண்டாம். எரிவாயு நிறுவனங்கள் ஒருபோதும் இத்தகைய விவரங்களைக் கேட்பதில்லை. 4. நேரடி சரிபார்ப்பு: ஏதேனும் சந்தேகம் இருந்தால், உடனடியாக உங்கள் எரிவாயு விநியோகஸ்தரை நேரடியாகத் தொடர்பு கொண்டு விவரங்களைக் கேட்டு உறுதிப்படுத்திக் கொள்ளுங்கள்.
புகார்
புகார் தெரிவிப்பது எப்படி?
சைபர் குற்றங்களுக்கு பலியாக நேரிட்டால், உடனடியாக '1930' என்ற எண்ணைத் தொடர்பு கொண்டோ அல்லது `www.cybercrime.gov.in' என்ற இணையதளம் வாயிலாகவோ புகார் அளிக்கலாம். விழிப்புணர்வுடன் செயல்படுவதே இத்தகைய நவீன கால மோசடிகளிலிருந்து தப்பிப்பதற்கான சிறந்த வழியாகும்.