புவிசார் குறையீடு பெற்ற கொடைக்கானல் மலைப்பூண்டின் அறுவடை துவக்கம்
செய்தி முன்னோட்டம்
தமிழ்நாடு, திண்டுக்கல் மாவட்டத்தில் கொடைக்கானல் மேல்மலை கிராமங்களான மன்னவன்னூர், பூம்பாறை, கூக்கால், பழம்புத்தூர் உள்ளிட்ட பகுதிகளில் மலைப்பூண்டு 900 எக்டேரில் சாகுபடி செய்யப்படுகிறது. இந்த மலைப்பூண்டு பாரம்பரிய வகை மற்றும் அதிக மருத்துவ தன்மை கொண்டது. இத்தகைய சிறப்புமிக்க கொடைக்கானல் மலைப்பூண்டுக்கு புவிசார் குறியீடும் அண்மையில் வழங்கப்பட்டது. இந்நிலையில் பயிரிடப்பட்ட 120 நாட்களில் மலைப்பூண்டு அறுவடைக்கு வரவுள்ளது. இங்கு விளையும் பூண்டு சாம்பல் நிறத்தில் காணப்படுகிறது. இதன் காரத்தன்மையும் அதிகமுள்ளது. புகைமூட்டம் செய்து இப்பூண்டினை பதப்படுத்தி வைத்தால் ஒரு வருடம் வரை கெடாமல் இருக்கும் என்று கூறப்படுகிறது. இதனையடுத்து, கடந்த 3 மாதங்களுக்கு முன்பு நடவு செய்யப்பட்ட மலைப்பூண்டுகள் தற்போது அறுவடை செய்யப்பட்டு வருகிறது.
பூண்டு
அறுவடை செய்த பச்சை பூண்டு ஒரு கிலோ ரூ.70க்கு விற்பனை
இதற்கான பணியில் விவசாயிகள் தீவிரமாக ஈடுபட்டுள்ளார்கள். சீதோஷண நிலை மாற்றம், மழையால் விளைச்சல் 70 சதவீதமாக குறைந்துள்ளது. இந்நிலையில் தற்போது அறுவடை செய்த பச்சை பூண்டு ஒரு கிலோ ரூ.70க்கும், புகை மூட்டம் செய்யப்பட்ட பூண்டு ஒரு கிலோ ரூ.280 முதல் ரூ.350 வரை விற்பனையாகிறது. விளைச்சல் குறைந்தாலும், போதிய விலை கிடைப்பதால் விவசாயிகள் நிம்மதி அடைந்துள்ளனர். இது குறித்து மன்னவன்னூர் விவசாயிகள் கூறுகையில், இந்தாண்டு மலைப்பூண்டு விளைச்சல் குறைவு மற்றும் வெளிமாநிலங்களில் இருந்து வரத்து அதிகரிப்பால் எதிர்பார்த்த விலை கிடைக்கவில்லை. புகை மூட்டம் செய்து பதப்படுத்திய பூண்டு ஒரு கிலோ ரூ.450 வரை விற்றால் மட்டுமே விவசாயிகளுக்கு கட்டுப்படியாகும் என்று கூறியுள்ளார்.