நாட்டிலேயே முதன்முறையாக வாடகை தாய் மூலம் கன்றினை ஈன்ற பசு
செய்தி முன்னோட்டம்
நாட்டுப்பசுக்களின் எண்ணிக்கையினை அதிகரிக்க மத்திய அரசு மற்றும் மாநில அரசு தொடர்ந்து பல நடவடிக்கைகளை மேற்கொண்டு வருகிறது.
இதனிடையே, தற்போது திருப்பதி தேவஸ்தானம் தனது கோசாலையில் வளர்த்து வரும் நாட்டுப்பசுக்களின் எண்ணிக்கையினை அதிகரிக்கும் விதத்தில் பல ஏற்பாடுகளை மேற்கொண்டது.
திருப்பதி ஏழுமலையானுக்கு நைவேத்திய பிரசாதம் தயார் செய்ய அவர்களுக்கு நாட்டு பசுக்களின் பால், தயிர், வெண்ணெய், நெய் உள்ளிட்ட பொருட்கள் அன்றாடம் தேவைப்படுகிறது.
இதற்கு அவர்களுக்கு 500 நாட்டு மாடுகள் தேவைப்படும் பட்சத்தில், தற்போது வெறும் 200 மாடுகள் தான் அவர்களிடம் கைவசமுள்ளது.
இக்காரணத்தினால் அவர்கள் இம்முயற்சியில் மிகத்தீவிரமாக செயல்பட்டு வந்தனர்.
இந்நிலையில், திருப்பதி தேவஸ்தானம் அதிகளவுப்பாலினை கொடுக்கும் உயர்ரக நாட்டு பசுக்களை வாடகைத்தாய் முறையில் கலப்பு இனங்களாக உற்பத்தி செய்ய முடிவுச்செய்துள்ளது.
நாட்டுமாடுகள்
ஸ்ரீ வெங்கடேஸ்வரா விலங்கியல் பல்கலைக்கழகத்துடன் புரிந்துணர்வு ஒப்பந்தம்
இதற்காக ஸ்ரீ வெங்கடேஸ்வரா விலங்கியல் பல்கலைக்கழகத்துடன் கடந்தாண்டு திருப்பதி தேவஸ்தானம் புரிந்துணர்வு ஒப்பந்தம் மேற்கொண்டதனையடுத்து, வடமாநிலங்களிலுள்ள உயர்ரக நாட்டுப்பசுக்களின் கருமுட்டைகள் சேகரிக்கப்பட்டது.
அந்த முட்டைகளை ஸ்ரீ வெங்கடேஸ்வரா விலங்கியல் பல்கலைக்கழக ஆய்வகத்திற்கு கொண்டுச்சென்று, அவற்றை வேறு உயர்ந்த ரகத்தினை சேர்ந்த நாட்டுக்காளைகளின் விந்தணுக்கள் மூலம் கருத்தரிக்கச்செய்துள்ளனர்.
அவ்வாறு உருவான கருக்களை இந்தியாவின் ஓங்கோல் போன்ற உயர்ரக நாட்டுமாடுகளின் கருப்பையில் செலுத்தி திருப்பதி தேவஸ்தானக்கோசாலையில் வைத்து வளர்த்து வருகிறார்கள்.
இதுபோல் 10க்கும் மேற்பட்ட பசுக்கள் தற்போது திருப்பதி தேவஸ்தான கோசாலையில் கர்ப்பமாகவுள்ளது.
அதன்படி இன்று(ஜூன்.,26)கோசாலையிலுள்ள ஓங்கோல் பசு ஒன்று, சாகிவால் என்னும் உயர்ரக இனத்தினைச்சார்ந்த கிடாரி கன்றினை ஈன்றுள்ளது.
இந்தியாவிலேயே முதன்முறையாக வாடகைத்தாய் முறையில் பிறந்த இந்தக்கன்றுக்கு பத்மாவதி என பெயர் சூட்டப்பட்டுள்ளது குறிப்பிடத்தக்கது.