ஈரோடு இடைத்தேர்தல்-இரட்டை இலை சின்னம் குறித்த உச்சநீதிமன்ற தீர்ப்பு வெளியீடு
செய்தி முன்னோட்டம்
ஈரோடு கிழக்கு தொகுதி இடைத்தேர்தல் வரும் 27ம்தேதி நடைபெறவுள்ள நிலையில், ஓ.பி.எஸ். அணி மற்றும் ஈ.பி.எஸ். அணி என இருவரும் இரு அணிகளாக பிரிந்து தனித்தனி வேட்பாளர்களை அறிவித்துள்ளார்கள்.
எனவே, அதிமுக'வின் இரட்டை இலை சின்னம் முடக்கப்பட அதிக வாய்ப்புகள் உள்ளதாக பேச்சுக்கள் வலம் வந்தன.
இந்நிலையில் இதுகுறித்து ஈ.பி.எஸ். தரப்பில் அளிக்கப்பட்ட இடையீட்டு மனுகுறித்த விசாரணை இன்று உச்சநீதிமன்றத்தில் மீண்டும் விசாரணைக்கு வந்தது.
அப்போது ஓ.பி.எஸ்., ஈ.பி.எஸ். மற்றும் தேர்தல் ஆணையம் சார்பில் அளிக்கப்பட்ட மனுக்கள் மீதான வாதங்கள் நடந்தது.
தொடர்ந்து, இந்த விவகாரத்திற்கு உச்சநீதிமன்றம் இடைக்கால தீர்ப்பு ஒன்றினை அளித்துள்ளது. அதன்படி, ஈரோடு கிழக்கு இடைத்தேர்தலுக்கான ஓ.பி.எஸ். தரப்பினரையும் உள்ளடக்கிய பொதுக்குழு நடத்தப்பட்டு, அந்த முடிவின்படி தீர்மானிக்கலாம் என்று உத்தரவிடப்பட்டுள்ளது.
தெளிவுபடுத்திய நீதிபதிகள்
இடைக்கால உத்தரவு இந்த இடைத்தேர்தலுக்கு மட்டுமே - உச்சநீதிமன்றம்
மேலும் இந்த உத்தரவு இந்த இடைத்தேர்தலுக்கு மட்டுமே என்றும் நீதிபதிகள் தெளிவுபடுத்தியுள்ளார்கள்.
பொதுக்குழு நடத்தப்பட்டு வாக்கு அடிப்படையில் அதிமுக வேட்பாளரை தேர்ந்தெடுக்கலாம் என்று கூறப்பட்டுள்ளது.
அவ்வாறு தேர்தெடுக்கப்படும் வேட்பாளர் தேர்தல் ஆணையத்திற்கு தமிழ்மகன் உசேன் அனுப்ப வேண்டும், அதனை தேர்தல் ஆணையம் ஏற்க வேண்டும் என்றும் உத்தரவிடப்பட்டுள்ளது.
இந்த இடைக்கால ஏற்பாடு என்பது பிரதான வழக்கில் எந்த வகையிலும் தோதாக கருத முடியாது என்றும் நீதிபதிகள் தெரிவித்துள்ளார்கள் என்பது குறிப்பிடவேண்டியவை.
முன்னதாக, இரு அணிகளாக பிரிந்து இருக்கும் அ.தி.மு.க.'வில், ஈ.பி.எஸ். தரப்பில் முன்னாள் எம்.எல்.ஏ., தென்னரசு போட்டியிடப்போவதாக எடப்பாடி பழனிச்சாமி அறிவித்தார்.
அதனை தொடர்ந்து ஓ.பி.எஸ். தரப்பில் செந்தில் முருகன் போட்டியிடுவார் என்று அதிகாரபூர்வமாக ஓ.பன்னீர் செல்வம் அண்மையில் அறிவித்திருந்தது குறிப்பிடத்தக்கது.