டெல்லியில் மீண்டும் ஒரு நிர்பயா? ஓடும் பேருந்தில் பெண் கூட்டு பாலியல் வன்கொடுமை! 2 பேர் கைது
செய்தி முன்னோட்டம்
டெல்லியின் நங்லோய் பகுதியில் ஓடும் தனியார் பேருந்து ஒன்றில் பெண் ஒருவர் கூட்டு பாலியல் வன்கொடுமைக்கு உள்ளாக்கப்பட்டதாகக் கூறப்படும் புகார், 2012 ஆம் ஆண்டு நடந்த நிர்பயா சம்பவத்தின் கோர நினைவுகளை மீண்டும் ஒருமுறை நினைவூட்டியுள்ளது. இந்தப் புகாரின் அடிப்படையில் டெல்லி காவல்துறை உடனடியாக முதல் தகவல் அறிக்கை (FIR) பதிவு செய்து, இரண்டு முக்கியக் குற்றவாளிகளைக் கைது செய்துள்ளதுடன், சம்பந்தப்பட்ட பேருந்தையும் பறிமுதல் செய்து தீவிர விசாரணை நடத்தி வருகிறது. கூடுதல் விவரங்கள் இங்கே:-
பின்னணி
நேரம் கேட்பது போல நடித்து அரங்கேறிய கொடூரம்
கடந்த மே 11 ஆம் தேதி இரவு, ராணி பாக் பகுதியில் உள்ள ஒரு தொழிற்சாலையில் வேலை முடித்துவிட்டுத் தனது வீட்டிற்குத் திரும்பிக்கொண்டிருந்த 30 வயதுப் பெண்ணிற்கு இந்தத் துயரம் நேர்ந்துள்ளது. சரஸ்வதி விஹார் பகுதியில் நின்றிருந்த ஒரு தனியார் ஸ்லீப்பர் பேருந்தின் அருகே இருந்த ஒரு நபரிடம் அப்பெண் நேரம் கேட்டுள்ளார். அந்தச் சமயத்தில் அவர் வலுக்கட்டாயமாகப் பேருந்துக்குள் இழுத்துச் செல்லப்பட்டதாகக் கூறப்படுகிறது. சுமார் 7 கிலோமீட்டர் தூரம் ராணி பாக் பகுதியைச் சுற்றி ஓடிக்கொண்டிருந்த அந்தப் பேருந்துக்குள், சுமார் இரண்டு மணி நேரமாக அவர் கூட்டுப் பாலியல் வன்கொடுமைக்கு உள்ளாக்கப்பட்டதாகப் புகாரில் தெரிவிக்கப்பட்டுள்ளது.
உடனடி நடவடிக்கை
வழக்குப் பதிவு செய்த டெல்லி காவல்துறை உடனடி நடவடிக்கை
பாதிக்கப்பட்ட பெண்ணின் புகாரைப் பெற்றவுடன் நங்லோய் காவல் நிலையப் போலீசார் போர்க்கால அடிப்படையில் செயல்பட்டு, இந்தக் குற்றச் செயலில் ஈடுபட்ட இரண்டு நபர்களை உடனடியாகக் கைது செய்தனர். குற்றம் நடந்ததாகக் கூறப்படும் தனியார் பேருந்து கண்டறியப்பட்டு காவல்துறையினரால் பறிமுதல் செய்யப்பட்டுள்ளது. மூன்று குழந்தைகளுக்குத் தாயான அந்தப் பெண், ஆரம்பத்தில் மருத்துவப் பரிசோதனைக்கு ஒத்துக்கொள்ளவில்லை என்று தகவல்கள் தெரிவிக்கின்றன. இருப்பினும், போலீசார் இந்த வழக்கை அனைத்துக் கோணங்களிலும் மிகத் தீவிரமாக விசாரித்து வருகின்றனர்.
மீண்டும் ஒரு நிர்பயா
டெல்லி காவல்துறை மற்றும் ஆளுநர் மீது ஆம் ஆத்மி கடும் விமர்சனம்
இந்தச் சம்பவம் குறித்துத் தனது எக்ஸ் பக்கத்தில் பதிவிட்டுள்ள ஆம் ஆத்மி கட்சியின் மூத்த தலைவரும் முன்னாள் அமைச்சருமான சௌரப் பரத்வாஜ், டெல்லி காவல்துறை மற்றும் துணைநிலை ஆளுநர் வினய் குமார் சக்சேனா ஆகியோரை மிகக் கடுமையாகச் சாடியுள்ளார். "மிகப்பெரிய அவமானம் - நிர்பயா மீண்டும் ஒருமுறை நடந்துள்ளது" என்று குறிப்பிட்டுள்ள அவர், தலைநகரின் சட்டம் ஒழுங்கு சீர்குலைந்துவிட்டதாகக் குற்றம் சுமத்தியுள்ளார். டெல்லி காவல்துறைத் தலைவர் மற்றும் ஆளுநர் ஆகியோர் மக்களின் பாதுகாப்பில் கவனம் செலுத்தாமல், சமூக வலைதளங்களில் நேரத்தைச் செலவிடுவதாக அவர் தனது கண்டனத்தைப் பதிவு செய்துள்ளார்.