சில செய்தி ஊடகங்கள் மீது அவதூறு வழக்கு உறுதி - டி.கே.சிவகுமார் பேட்டி
செய்தி முன்னோட்டம்
கர்நாடகா மாநிலத்தில் நடந்து முடிந்த சட்டப்பேரவை தேர்தலில் காங்கிரஸ் கட்சி பாஜக'வினை வீழ்த்தி தனிப்பெரும்பான்மை பெற்று ஆட்சியினை கைப்பற்றியுள்ளது.
எனினும், யாருக்கு முதல்வர் பதவி என்பதில் சித்தராமையா, டி.கே.சிவகுமார் இடையே கடும் போட்டி நிலவி வருகிறது.
இது குறித்து நடத்தப்பட்ட காங்கிரஸ் கட்சியின் எம்.எல்.ஏ.க்கள் கூட்டத்தில் யார் முதல்வர் என்பதை தேர்ந்தெடுக்கும் பொறுப்பினை கட்சியின் தேசிய தலைவர் மல்லிகார்ஜுன கார்கேவிடம் ஒப்படைத்து தீர்மானம் நிறைவேற்றப்பட்டது.
அதன்படி ஆலோசனை கூட்டத்தில் பங்கேற்க சித்தராமையா நேற்று(மே.,15) தனி விமானம் மூலம் டெல்லி சென்றடைந்தார்.
அன்று மாலையே டெல்லி செல்லவேண்டிய டி.கே.சிவகுமார் தனது உடல்நிலை பாதிப்பு காரணமாக இன்று(மே.,16) புறப்பட்டு டெல்லிக்கு சென்றடைந்துள்ளார்.
காங்கிரஸ்
மல்லிகார்ஜுன கார்கேவினை நேரில் சந்தித்த டி.கே.சிவகுமார்
அதன்படி அவர் மல்லிகார்ஜுன கார்கே அவர்களையும் நேரில் சென்று சந்தித்துள்ளார்.
இதற்கிடையே செய்தியாளர்களுக்கு பேட்டியளித்த அவர், காங்கிரஸ் கட்சி எனது தாய் போல்.
இந்த கட்சியினை நான் உருவாக்கினேன்.
அப்படியிருக்கையில் இந்த கட்சியினை விட்டு நான் ராஜினாமா செய்து விலகுவதாக சில ஊடகங்கள் செய்திகளை வெளியிடுகிறார்கள்.
அவர்கள்மீது அவதூறு வழக்கு நிச்சயம் தொடருவேன் என்று ஆவேசமாக கூறியுள்ளார்.
முன்னதாக டெல்லி பயணத்திற்கு முன்னர் செய்தியாளர்களை சந்தித்து பேசிய அவர், எங்களுடையது ஒற்றுமையான வீடு, அதில் தற்போது 135உறுப்பினர்கள் உள்ளனர்.
அவர்கள் என்னை விரும்பினாலும் விரும்பாவிட்டாலும் யாரையும் தனியாக பிரிக்க நான் விரும்பவில்லை.
பதவிக்காக நான் முதுகில் குத்தமாட்டேன், மிரட்டவும் மாட்டேன்.
எங்கள் அடுத்த இலக்கு மக்களவை தேர்தலில் வெல்வது தான் என்று கூறியுள்ளார்.