தமிழகத்தில் உச்சத்தை தொட்ட தினசரி மின்தேவை - 17,647 மெகாவாட்டாக அதிகரிப்பு
தமிழகத்தில் மின் நுகர்வோர் எண்ணிக்கை 2.67 கோடியாக உள்ளது. அதன்படி மின்தேவையானது சராசரியாக 15 ஆயிரம் மெகாவாட்டாக இருந்து வந்தது. இதில் விவசாய தேவைக்கு 2,500 மெகாவாட் என்னும் அளவு இருந்துள்ளது. இந்நிலையில் தற்போது கோடை காலம் துவங்கியுள்ள நிலையில், வெப்பமும் அதிகரிக்க துவங்கிவிட்டது. வீடுகளில் ஏசி, மின்விசிறி, போன்ற பயன்பாடு அதிகரிக்கும் நிலையில், மின்தேவையானது 16 ஆயிரம் மெகாவாட்'டிற்கு மேல் உள்ளது. இதற்கிடையே விவசாய பிரிவில் தற்போது கூடுதலாக வழங்கப்பட்டுள்ள 1.50 லட்சம் மின் இணைப்புகள் காரணமாக அந்த பிரிவின் கீழ் மட்டும் 727 மெகாவாட் மின்தேவை அதிகரித்துள்ளது. இதனால் எப்போதும் இல்லாத அளவாக நேற்று முன்தினம் தினசரி மின்தேவை 17,647 மெகாவாட்டாக அதிகரித்து பெரும் உச்சத்தை தொட்டுள்ளது.
அனல்மின் நிலையங்களில் முழுஅளவில் உற்பத்தி
இதுகுறித்து மின்வாரிய அதிகாரிகள் கூறுகையில், மத்திய தொகுப்பில் இருந்து 5,800 மெகாவாட், சூரியசக்தி, அனல் மின் நிலையங்களில் தலா 3,800மெகாவாட் மின்சாரம் உள்ளிட்டவை கொண்டு இந்த மின்தேவையானது பூர்த்திசெய்யப்பட்டுள்ளது என்று கூறியுள்ளனர். கோடை காலத்தின் துவக்கத்திலேயே 17 ஆயிரம் மெகாவாட் மின்தேவை உள்ளநிலையில், வரும் நாட்களில் இது 18 ஆயிரம் முதல் 19 ஆயிரம் வரை அதிகரிக்கக்கூடும் என எதிர்பார்க்கப்படுகிறது என்றும் அவர்கள் கூறியுள்ளனர். எனவே, இதனை ஈடுசெய்ய மின்வாரியம் தனது அனல்மின் நிலையங்களில் முழுஅளவில் உற்பத்தியினை மேற்கொள்ள நடவடிக்கை மேற்கொள்ளப்பட்டுள்ளது. இதை தவிர தனியார் நிறுவனங்களிடம் இருந்தும் மின்சாரம் கொள்முதல் செய்யப்படும் என்று அவர்கள் தெரிவித்துள்ளார்கள். கடந்த 2022ம்ஆண்டு ஏப்ரல்29ம்தேதி 17,563 மெகாவாட் மின்சார பயன்பாடு என்பதே சாதனையாக இருந்தது குறிப்பிடத்தக்கது.
