ஜெய்ஷ், லஷ்கர் அமைப்புகளை சேர்ந்த 23 நபர்களை பயங்கரவாதிகளாக அறிவித்தது மத்திய அரசு; UAPA சட்டத்தின் கீழ் நடவடிக்கை
செய்தி முன்னோட்டம்
பயங்கரவாதத்திற்கு எதிரான இந்தியாவின் பூஜ்ஜிய சகிப்புத்தன்மை கொள்கையின் ஒரு பகுதியாக, பாகிஸ்தானை தளமாகக் கொண்டு செயல்படும் 23 நபர்களைச் சட்டவிரோத நடவடிக்கைகள் தடுப்பு சட்டத்தின் (UAPA) கீழ் பயங்கரவாதிகளாக மத்திய அரசு அதிகாரப்பூர்வமாக அறிவித்துள்ளது. இது குறித்து மத்திய உள்துறை அமைச்சகம் ஜூலை 4, 2026 அன்று வெளியிட்டுள்ள புதிய அரசிதழ் அறிவிப்பில், ஜெய்ஷ்-இ-முகமது மற்றும் லஷ்கர்-இ-தொய்பா ஆகிய தடைசெய்யப்பட்ட அமைப்புகளுடன் தொடர்புடைய முக்கிய நபர்களின் பெயர்கள் இடம்பெற்றுள்ளன. இவர்கள் அனைவரும் ஜம்மு காஷ்மீரில் பயங்கரவாத ஆள்சேர்ப்பு, எல்லை ஊடுருவல், ட்ரோன்கள் மூலம் ஆயுத சப்ளை மற்றும் தாக்குதல்களுக்குத் திட்டமிடுதல் போன்றவற்றில் ஈடுபட்டவர்கள் ஆவர்.
ஹபீஸ் சயீத்
ஹபீஸ் சயீதின் முக்கிய கூட்டாளிகளுக்குக் குறி
தற்போது அறிவிக்கப்பட்டுள்ள 23 நபர்களில், லஷ்கர்-இ-தொய்பா அமைப்பின் நிறுவனர் ஹபீஸ் முஹம்மது சயீதின் மிக நெருங்கிய கூட்டாளிகளான ரானா இப்திகார், அப்துல் ரவூஃப் மற்றும் ஹபீஸ் காலித் வலீத் ஆகிய 3 முக்கிய நபர்களின் பெயர்கள் சேர்க்கப்பட்டுள்ளன. இதில் 54 வயதான ரானா இப்திகார் இளைஞர்களை பயங்கரவாதப் பாதைக்குத் தூண்டுவதிலும், 52 வயதான அப்துல் ரவூஃப் நிதி திரட்டுதல் மற்றும் ஹபீஸ் சயீதின் நேரடி உத்தரவின் கீழ் லஷ்கர் அமைப்பின் முக்கிய செயல்பாடுகளை ஒருங்கிணைப்பதிலும் ஈடுபட்டு வந்ததாக மத்திய உள்துறை அமைச்சகம் தனது அறிவிப்பில் மிகத் தெளிவாகக் குறிப்பிட்டுள்ளது.
ராணுவ முகாம் தாக்குதல் பின்னணி
ராணுவ முகாம் தாக்குதல்களின் பின்னணியில் உள்ள சூத்திரதாரிகள்
இந்த புதிய பட்டியலில் கடந்த 2016 ஆம் ஆண்டு ஜம்முவின் நக்ரோடா ராணுவ முகாம் மீது நடத்தப்பட்ட கொடூர தாக்குதலின் முக்கிய சூத்திரதாரிகளான முஃப்தி முகமது அஸ்கர் கான், ஹபீஸ் அப்துல் ஷகூர் மற்றும் அப்துல்லா ஜிஹாதி ஆகிய 3 ஜெய்ஷ்-இ-முகமது அமைப்பின் கமாண்டர்கள் சேர்க்கப்பட்டுள்ளனர். அதேபோல, கடந்த 2022 ஆம் ஆண்டு சன்ஜ்வான் பகுதியில் உள்ள பாதுகாப்புப் படை சாவடி மீது நடத்தப்பட்ட தாக்குதலின் பின்னணியில் இருந்த மசூத் இல்யாஸ் காஷ்மீரி மற்றும் முகமது முசாதிக்கிக் ஆகியோரும் தற்பொழுது பயங்கரவாதிகளாக அறிவிக்கப்பட்டுள்ளனர். இவர்கள் ட்ரோன்கள் மூலமாக இந்திய எல்லைக்குள் ஆயுதங்களை அனுப்பிய வழக்குகளிலும் தேடப்பட்டு வருபவர்கள் ஆவர்.
சட்டப்பூர்வ அதிகாரம்
தனிநபர் பயங்கரவாதிகள் பட்டியலின் சட்டபூர்வ அதிகாரம்
கடந்த 2019 ஆம் ஆண்டில் UAPA சட்டத்தில் கொண்டு வரப்பட்ட முக்கிய திருத்தத்தின் மூலமே, அமைப்புகளைத் தாண்டி தனிநபர்களையும் பயங்கரவாதிகளாக அறிவிக்கும் அதிகாரம் மத்திய அரசுக்குக் கிடைத்தது. சனிக்கிழமை வெளியிடப்பட்ட இந்த புதிய சேர்க்கையின் மூலம், இந்தியாவின் அதிகாரப்பூர்வ தனிநபர் பயங்கரவாதிகள் பட்டியலின் ஒட்டுமொத்த எண்ணிக்கை தற்பொழுது 80 ஆக உயர்ந்துள்ளது. இந்த அறிவிப்பின் மூலம், தேசிய புலனாய்வு முகமை இந்த 23 நபர்களின் சர்வதேச நிதிப் பரிவர்த்தனைகளை முடக்கவும், அவர்களின் சொத்துக்களைப் பறிமுதல் செய்யவும், ஆயுத விற்பனைக்கான தடைகளை விதிக்கவும் சட்டபூர்வமான முழு அதிகாரத்தைப் பெற்றுள்ளது.
பிரஹார் கொள்கை
இந்தியாவின் புதிய 'பிரஹார்' பாதுகாப்பு கொள்கை
எல்லை தாண்டிய பயங்கரவாத வலைப்பின்னல்களை ஒடுக்குவதற்காக ட்ரோன் கண்காணிப்பு, குறியாக்கப்பட்ட தகவல் தொடர்பு முடக்கம் போன்ற நவீன உத்திகளை இந்தியப் பாதுகாப்பு முகமைகள் தீவிரமாகப் பயன்படுத்தி வருகின்றன. பயங்கரவாதக் கட்டமைப்புகளை வேரோடு அழிப்பதற்காக, இந்திய அரசு இந்த ஆண்டு 'பிரஹார்' (PRAHAAR) என்ற நாட்டின் முதலாவது விரிவான தேசிய பயங்கரவாத எதிர்ப்பு கொள்கை மற்றும் உத்தியை அறிமுகப்படுத்தியுள்ளது. இந்த புதிய பாதுகாப்பு கோட்பாட்டின் கீழ், உளவுத்துறை மற்றும் பல்வேறு ஏஜென்சிகளின் கூட்டு ஒருங்கிணைப்புடன் பயங்கரவாத நிதி வழிகளை முன்கூட்டியே கண்டறிந்து முடக்கும் பணிகள் தற்பொழுது மிக தீவிரமாக முடுக்கிவிடப்பட்டுள்ளன.