ராம நவமி வன்முறை குறித்து NIA விசாரிக்க வேண்டும்: நீதிமன்றம் உத்தரவு
மேற்கு வங்கத்தில் ராம நவமி அன்று நடந்த வன்முறை குறித்து தேசிய புலனாய்வு அமைப்பு(NIA) விசாரணை நடத்த வேண்டும் என்று கொல்கத்தா உயர் நீதிமன்றம் உத்தரவிட்டுள்ளது. மேற்கு வங்கத்தில் கடந்த மாதம் ராம நவமி கொண்டாட்டத்தின் போது வன்முறை வெடித்தது. பாஜக தலைவர் சுவேந்து அதிகாரி தாக்கல் செய்த மனுவை விசாரித்த உயர்நீதிமன்றம், மேற்கு வங்க காவல்துறையிடம் இருந்து விசாரணையை பயங்கரவாத தடுப்பு ஏஜென்சிக்கு மாற்றி உத்தரவிட்டது. மேலும், அனைத்து பதிவுகள் மற்றும் சிசிடிவி காட்சிகளை இரண்டு வாரங்களுக்குள் மத்திய அரசிடம் சமர்ப்பிக்க வேண்டும் என்றும், NIAவுக்கு ஒத்துழைப்பு அளிக்க வேண்டும் என்றும் நீதிமன்றம் காவல்துறைக்கு உத்தரவிட்டது.
வகுப்புவாத பதற்றத்தைத் தூண்ட பாஜக முயற்சிக்கிறது: மம்தா பானர்ஜி
கடந்த மாதம் ராம நவமி கொண்டாட்டத்தின் போது ஹவுராவின் ஷிப்பூரில் இரு குழுக்களிடையே மோதல் வெடித்ததால், பல வாகனங்கள் தீ வைத்து எரிக்கப்பட்டன, கற்கள் வீசப்பட்டன மற்றும் கடைகள் சூறையாடப்பட்டன. பின்னர் ஹூக்லி மற்றும் தல்கோலா மாவட்டங்களிலும் மோதல்கள் ஏற்பட்டது. திரிணாமுல் காங்கிரஸ் மற்றும் பாஜக ஆகிய இரு கட்சிகளும் வன்முறையின் போது பதிவு செய்யப்பட்ட வீடியோக்களை பகிர்ந்து, ஒருவரையொருவர் குற்றம் சாட்டினர். மாநில காவல்துறையால் விசாரிக்கப்படுவதை தவிர்க்க, பாஜக உயர் நீதிமன்றத்தை நாடியுள்ளது என்று திரிணாமுல் காங்கிரஸ் எம்பி அபிஷேக் பானர்ஜி குற்றம்சாட்டி இருந்தார். ராமநவமி ஊர்வலத்தின் போது வகுப்புவாத பதற்றத்தைத் தூண்ட பாஜக முயற்சித்ததாக முதல்வர் மம்தா பானர்ஜி குற்றம் சாட்டி இருந்தார்.
இந்த காலவரிசையைப் பகிரவும்