தமிழக விவசாயிகளுக்கு 24 மணிநேரமும் மும்முனை மின்சாரம் - மின்சாரத்துறை அமைச்சர் செந்தில் பாலாஜி
தமிழக சட்டப்பேரவையில் இன்று(ஏப்ரல்.,5) கேள்வி நேரத்தின் பொழுது சிவகங்கை சட்டமன்ற உறுப்பினர் செந்தில்நாதன், சிவகங்கை மிகுந்த வறட்சியான மாவட்டமாக உள்ளது. நிலத்தடி நீர் தான் இங்குள்ள விவசாயிகளுக்கு நீர் ஆதாரம். இதனால் தற்போது 18 மணிநேர மின்சாரம் என்பதை 24 மணிநேர மின்சாரமாக மாற்றி விவசாயத்திற்கு மும்முனை மின்சாரம் வழங்க வேண்டும் என்று அவர் கேட்டுக்கொண்டார். அதே போல் விவசாயம் செய்யும் நிலத்தில் ஆழ்துளை கிணறு தோண்டியவர்களுக்கு அருகில் உள்ள நிலத்திற்கு தண்ணீர் பாய்ச்ச முடியாத நிலை ஏற்படுகிறது. இதற்காக அவர்கள் கட்டணம் கட்ட தயாராக உள்ளார்கள். இது குறித்தும் பரிசீலிக்க வேண்டும் என்று கூறினார்.
இதர கோரிக்கைகள் முதல்வரின் கவனத்திற்கு கொண்டு செல்லப்படும் - அமைச்சர்
இவருக்கு பதிலளிக்கும் விதமாக மின்சாரத்துறை அமைச்சர் செந்தில் பாலாஜி பேசுகையில், விவசாயிகளுக்கு 24 மணிநேர மின்சாரம் என்பது முதல்வரின் உத்தரவாக உள்ளது என்று கூறினார். தொடர்ந்து பேசிய அவர், மின் பகிர்மானத்திற்கான கட்டமைப்பு பணிகள் நடந்து வருகிறது. பணி முடிந்ததும் மும்முனை மின்சாரம் வழங்குவது குறித்து தமிழக முதல்வர் மு.க.ஸ்டாலின் அவர்கள் முடிவெடுப்பார் என்று தெரிவித்தார். மேலும் தற்போது சிவகங்கை மாவட்டத்திற்கு 3,232 விவசாயிகளுக்கு இலவச மின் இணைப்புகள் வழங்கப்பட்டுள்ளது. இதர கோரிக்கைகள் குறித்து தமிழக முதல்வரின் கவனத்திற்கு கொண்டு செல்லப்பட்டு பரிசீலனை செய்யப்படும் என்றும் அமைச்சர் செந்தில் பாலாஜி கூறியது குறிப்பிடத்தக்கது.
இந்த காலவரிசையைப் பகிரவும்