தேர்தல் பத்திரங்கள் தொடர்பான பிரமாணப் பத்திரத்தை உச்ச நீதிமன்றத்தில் தாக்கல் செய்தது எஸ்பிஐ
செய்தி முன்னோட்டம்
தேர்தல் பத்திரங்கள் தொடர்பான வழக்கில் உச்ச நீதிமன்றம் எச்சரிக்கை விடுத்ததை அடுத்து, பாரத ஸ்டேட் வங்கி(எஸ்பிஐ) இன்று பிரமாணப் பத்திரத்தை தாக்கல் செய்தது.
கடந்த மாதம் தேர்தல் பத்திரத் திட்டத்தை ரத்து செய்து உச்ச நீதிமன்றம் ஒரு வரலாற்றுத் தீர்ப்பை வழங்கியது.
இந்த பத்திரங்களை வழங்குவதை நிறுத்தவும், இந்த முறையில் அளிக்கப்பட்ட நன்கொடைகளின் விவரங்களை தேர்தல் ஆணையத்திடம் மார்ச் 6 ஆம் தேதிக்குள் தெரிவிக்கவும் அப்போது எஸ்பிஐக்கு உச்சநீதிமன்றம் உத்தரவிட்டது.
குடிமக்களின் தகவல் அறியும் உரிமையை மீறுவதால் இந்த சர்ச்சைக்குரிய தேர்தல் பத்திரத் திட்டத்தை உச்ச நீதிமன்றம் ரத்து செய்தது.
ஆனால், இந்த விவரங்களை வெளியிட பாரத ஸ்டேட் வங்கி, கூடுதல் அவகாசம் கோரி இருந்தது.
இந்தியா
பிராமண பத்திரத்தில் கூறப்பட்டிருக்கும் தகவல்கள்
இந்நிலையில், எஸ்பிஐயின் இந்த கோரிக்கையை இரண்டு நாட்களுக்கு முன் விசாரித்த உச்ச நீதிமன்றம், "அந்த விவரங்களை நாளைக்குள்(மார்ச் 12) இந்திய தேர்தல் ஆணையத்திடம்(இசிஐ) பகிர்ந்து கொள்ள வேண்டும்" என்று உத்தரவிட்டது.
அதோடு சேர்த்து பிராமண பத்திரத்தையும் உச்ச நீதிமன்றத்தில் தாக்கல் செய்ய வேண்டும் என்று நீதிபதிகள் உத்தரவிட்டனர்.
உச்ச நீதிமன்ற தீர்ப்புக்கு இணங்க, நேற்று மாலை தேர்தல் பத்திரங்கள் குறித்த தகவல்களை இந்திய தேர்தல் ஆணையத்திடம் சமர்ப்பித்த எஸ்பிஐ, இன்று அதற்கான பிராமண பத்திரத்தை உச்ச நீதிமன்றத்தில் தாக்கல் செய்தது.
தேர்தல் ஆணையத்திடம் ஒரு பென்டிரைவில் தரவுகளை சமர்ப்பித்துள்ளதாக எஸ்பிஐ தனது பிரமாணப் பத்திரத்தில் கூறியுள்ளது.
இரண்டு PDF கோப்புகளில் உள்ள அந்த தரவுகள், கடவுச்சொல்லால் பாதுகாக்கப்பட்டுள்ளது என்றும் அது கூறியுள்ளது.
இந்தியா
தேர்தல் பத்திரங்கள் திட்டம் குறித்த விவரங்கள்
உச்சநீதிமன்றம் தேர்தல் பத்திர திட்டத்தை ரத்து செய்வதற்கு முன்பு, ஏப்ரல் 2019 முதல் பிப்ரவரி 15, 2024 வரை மொத்தம் 22,217 தேர்தல் பத்திரங்கள் வழங்கப்பட்டதாகவும் வங்கி தனது வாக்குமூலத்தில் கூறியுள்ளது.
அதில், 22,030 பத்திரங்களை அரசியல் கட்சிகள் எடுத்துக்கொண்டன என்றும், மீதமுள்ள 187 பத்திரங்கள் மீட்கப்பட்டு, விதிகளின்படி பிரதமரின் தேசிய நிவாரண நிதியில் டெபாசிட் செய்யப்பட்டது என்றும் எஸ்பிஐ வங்கி தெரிவித்துள்ளது.
தேர்தல் பத்திரங்கள் திட்டத்தின் கீழ், நன்கொடையாளர்கள் தங்களுக்கு விருப்பமான கட்சிகளுக்கு நன்கொடை அளிக்க பத்திரங்களை வாங்கலாம்.
ஆனால் அரசியல் கட்சிகள் 15 நாட்களுக்குள் அந்த பத்திரங்களை மீட்டெடுக்க வேண்டும், இல்லையெனில் அந்தத் தொகை பிரதமரின் நிவாரண நிதிக்கு செல்லும்.