பாலிவுட்டில் கால் பதிக்கும் யாஷ்! 'ராமாயணம்' படத்தில் நடிக்க வைக்க பேச்சு வார்த்தை!
ராமாயண காவியத்தை படமாக எடுக்க பாலிவுட்டில் முயற்சிகள் நடைபெற்று வருகிறது. அதில், கேஜிஎஃப் நாயகன் யாஷ்-ஐ, முக்கிய வில்லனாக, அதாவது ராவணனாக நடிக்க வைக்க பேச்சு வார்த்தைகள் நடைபெறுவதாக ஊடகங்கள் தெரிவிக்கின்றன. சிச்சோரே பட புகழ் நிதேஷ் திவாரி, ராமாயணத்தை படமாக எடுப்பதற்காக கிட்டத்தட்ட மூன்று ஆண்டு காலமாய் முயற்சித்து வருகிறார். யாஷ்-ஐ அணுகுவதற்கு முன்னர் இந்த வேடத்தில், ஹ்ரித்திக் ரோஷனை நடிக்க வைக்க முயற்சிகள் நடைபெற்றதாகவும், ஆனால் அவர் மறுத்துவிட்டதாகவும் செய்திகள் தெரிவிக்கின்றன. KGF படத்தில், யாஷின் நடிப்பைப் பார்த்து, அவரை இவ்வேடத்தில் நடிக்க வைக்க பேசி இருப்பதாகவும், யாஷின் சம்மதத்திற்காக படக்குழுவினர் காத்திருப்பதாகவும் செய்திகள் கூறுகின்றன.
ராமராக ரன்பிர் கபூரும், சீதா பிராட்டியாக சாய் பல்லவியும் நடிக்க போகும் ராமாயணம்?
மேலும், இந்த படத்தில் ராமர் வேடத்தில் ரன்பிர் கபூரும், சீதா வேடத்தில் சாய் பல்லவியும் நடிக்க போவதாக கூறப்படுகிறது. மறுபுறம், யாஷ், தனது அடுத்த படமான 'யாஷ்-19' படவேலைகளில் தீவிரமாக ஈடுபட்டு இருப்பதால், இன்னும் ஒரு மாதத்தில், ராமாயணம் படத்தை குறித்து முடிவெடுப்பார் எனத்தெரிகிறது. ஒரு வேளை, யாஷ் ஒப்புக்கொண்டால், இன்னும் 3 மாதங்களில் படப்பிடிப்பு துவங்கும் என ஊடகங்கள் தெரிவிக்கின்றன. இதனிடையே, கேஜிஎஃப் படத்தின் இயக்குனர், பிரசாந்த் நீல், தற்போது பிரபாஸ் நடிக்கும், சலார் படத்தை இயக்கி கொண்டிருக்கிறார். அந்த படத்தில், கெஸ்ட் ரோலில், KGF நாயகன் யாஷும் நடிக்கவுள்ளதாக ஒரு தகவல் வெளியாகி உள்ளது.
