ராமாயணா ரூ.4,000 கோடி பட்ஜெட் சர்ச்சை: நடிகர் யாஷ் கொடுத்த விளக்கம்
செய்தி முன்னோட்டம்
நிதேஷ் திவாரி இயக்கத்தில் பிரம்மாண்டமாக உருவாகியுள்ள ராமாயணா திரைப்படத்தின் பிரத்யேக டிரெய்லர் வெளியீட்டு விழாவில் பேசிய நடிகர் யாஷ், படத்தின் ரூ.4,000 கோடி பட்ஜெட் குறித்து எழுந்துள்ள விமர்சனங்களுக்குத் தனது தெளிவான விளக்கத்தை அளித்துள்ளார். சர்வதேச திரைப்பட சந்தையில் இந்தியப் படைப்பைக் கொண்டு செல்லும் போது, அதன் உலகளாவிய முதலீட்டு மதிப்பைக் குறிப்பிடுவது காலத்தின் கட்டாயம் என்றும், நம் நாட்டுத் திரைப்படங்களை நாமே தேவையின்றி விமர்சிப்பதை நிறுத்த வேண்டும் என்றும் யாஷ் உருக்கமாகக் கேட்டுக் கொண்டுள்ளார்.
ரூ.4,000 கோடி பட்ஜெட்
உலகளவில் இந்தியப் படத்தை உயர்த்துவோம்
டிரெய்லர் வெளியீட்டு விழாவில் படக்குழுவினருடன் பங்கேற்ற நடிகர் யாஷ் பேசுகையில், "இப்படம் ரூ.4,000 கோடி பட்ஜெட்டில் உருவாகியுள்ளது என்று கூறினார்.
சர்வதேச அரங்கில் இந்தியத் திரைப்படத்தைக் கொண்டு செல்லும் போது அதன் பிரம்மாண்ட முதலீட்டைப் பதிவு செய்வது இன்றியமையாதது.
அப்போதுதான் வெளிநாட்டினர் சாதாரண ஒரு சிறு பட்ஜெட் படம் என்று நினைத்துக் குறைத்து மதிப்பிட மாட்டார்கள்.
இந்தத் தொகையானது படத்தின் இரண்டு பாகங்கள் மற்றும் உலகம் தழுவிய விளம்பரச் செலவுகள் அனைத்தையும் உள்ளடக்கிய ஒருங்கிணைந்த முதலீடாகும்.
டீசர் அல்லது டிரெய்லர் வெளியான உடனே மற்ற படங்களுடன் ஒப்பிட்டு விஎஃப்எக்ஸ் அல்லது நடிகர் தேர்வைக் குறை சொல்வதை இந்தியர்கள் தவிர்க்க வேண்டும்.
நம் நாட்டுப் படைப்புகளை நாமே ஒருங்கிணைந்து ஆதரிக்க வேண்டும்" என்று வலியுறுத்தினார்.
தீபாவளி வெளியீடு
ரன்பீர் கபூருக்குப் பாராட்டு
இப்படத்தில் ராமர் கதாபாத்திரத்தை ஏற்று நடித்துள்ள ரன்பீர் கபூரின் அர்ப்பணிப்பைப் பெரிதும் பாராட்டிய யாஷ், "ராமர் வேடத்திற்காக ரன்பீர் காட்டிய நேர்மையும் தீவிரமான அர்ப்பணிப்பும் வியக்க வைக்கிறது.
ஒரு கதாபாத்திரத்திற்காகத் தன்னை இந்த அளவிற்கு முழுமையாக ஒப்புக்கொடுத்து அர்ப்பணித்த ஒரு நடிகரை நான் பார்த்ததே இல்லை" என்று நெகிழ்ச்சியுடன் தெரிவித்தார்.
ரன்பீர் கபூர், சாய் பல்லவி, யாஷ், சன்னி தியோல், ரவி துபே உள்ளிட்ட நட்சத்திரப் பட்டாளத்துடன், ஆஸ்கர் நாயகன் ஏ.ஆர்.ரஹ்மான் மற்றும் ஹாலிவுட் இசை மேதை ஹான்ஸ் ஜிம்மர் இணைந்து இசையமைத்துள்ள இப்படத்தின் முதல் பாகம், தீபாவளி பண்டிகையை முன்னிட்டு வரும் நவம்பர் 5-ஆம் தேதி பான்-இந்தியா முறையில் திரையரங்குகளில் வெளியாகவுள்ளது.