மகேஷ் பாபுவின் 'வாரணாசி' படம் எப்படி உருவாகியுள்ளது? ராஜமௌலி வெளியிட்ட அப்டேட்
செய்தி முன்னோட்டம்
உலக புகழ்பெற்ற திரைப்பட இயக்குனரான எஸ்.எஸ். ராஜமௌலி, பிரேசிலில் நடைபெற்ற 50-வது சாவோ பாலோ சர்வதேச திரைப்பட விழாவில் கலந்துகொண்டார். அப்போது அவருக்கு கவுரவமிக்க 'லியோன் காகோஃப் விருது' வழங்கி சிறப்பிக்கப்பட்டது. விழாவை ஒட்டி பிரேசில் ஊடகமான ஆக்ஸென்ட் பிபோகா நிறுவனத்திற்குப் பேட்டியளித்த அவர், மகேஷ் பாபு மற்றும் பிரியங்கா சோப்ரா ஜோனாஸ் நடிப்பில் தான் இயக்கி வரும் 'வாரணாசி' படம் குறித்த பல சுவாரஸ்யமான மற்றும் பிரம்மாண்டமானத் தகவல்களைப் பகிர்ந்து கொண்டார்.
படப்பிடிப்பு
படப்பிடிப்பு இறுதி கட்டத்தை எட்டியது
படம் குறித்து பேசிய ராஜமௌலி, "நான் மிகவும் மகிழ்ச்சியாக இருக்கிறேன், ஏனெனில் எங்களது படத்தின் படப்பிடிப்பு தற்போது நிறைவடையும் தருவாயில் உள்ளது; இன்னும் வெறும் 10 நாட்களே எஞ்சியுள்ளன, அந்தப் பணியும் விரைவில் முழுமையடைந்துவிடும்" எனத் தெரிவித்தார்.
இது மிகவும் லட்சியமான மற்றும் பிரம்மாண்டமான திட்டம் என்றும், இப்படத்தின் ஒவ்வொரு காட்சியும் ஒரு முழு நீளத் திரைப்படத்திற்கு இணையானது என்றும் அவர் வர்ணித்துள்ளார்.
ஆறு அல்லது ஏழு திரைப்படங்களை ஒன்றாக இணைத்தது போன்ற மிகப்பெரிய உழைப்பு இதில் செலவிடப்பட்டுள்ளதாகவும், கடந்த இரண்டு ஆண்டுகள் மிகவும் சோர்வைத் தந்த அதேசமயம் சவாலான ஆண்டுகளாக இருந்ததாகவும் அவர் குறிப்பிட்டார்.
தற்போது இப்படம் போஸ்ட்-புரொடக்ஷன் கட்டத்திற்கு நகர்வதாகத் தெரிவித்தார்.
கதைக்களம்
'வாரணாசி' படத்தின் கதைக்களம் மற்றும் கருப்பொருள்
கடந்த 2025-ஆம் ஆண்டு பிப்ரவரி மாதம் தொடங்கப்பட்ட இந்தப் படத்தின் படப்பிடிப்பு இந்தியா, கென்யா, அண்டார்டிகா மற்றும் ஜார்ஜியா உள்ளிட்ட உலகின் பல்வேறு பகுதிகளில் நடத்தப்பட்டுள்ளது.
படத்தின் கதைக்களம் குறித்து ராஜமௌலி கூறுகையில், "இப்படம் தந்தைக்கும் மகனுக்கும் இடையேயான பிணைப்பை மையமாகக் கொண்ட ஒரு உணர்ச்சிகரமான பயணமாகும். ஆரம்பத்தில் பிரிந்து செல்லும் தந்தை - மகன் உறவு எப்படி மீண்டும் இணைகிறது என்பது படத்தின் முக்கியக் கருவாகும். மேலும், இதில் இளைய தலைமுறை ஜோடிகளுக்கிடையேயான அழகான காதல் கதையும் பார்வையாளர்களைக் கவரும் வகையில் மாயாஜாலம் செய்யும்" என்றார்.