23 வருடங்களுக்கு பிறகு இணையும் ஜோடி: AK62-வில் ஐஸ்வர்யா ராய் நடிக்கிறாரா?
அஜித்தின் 62 -வது திரைப்படமான, AK62 -வில், நடிகை ஐஸ்வர்யா ராய் நடிக்கவிருப்பதாக தகவல் வெளியாகி உள்ளது. விக்னேஷ் சிவன் இயக்கும் இந்த திரைப்படத்தின் அறிவிப்பு, சென்ற மாதம் வெளியானது. லைக்கா நிறுவனம் தயாரிக்கும் இப்படத்தில் பல முன்னணி நட்சத்திரங்கள் நடிப்பதாக ஏற்கனவே செய்திகள் வெளியாயின. எனினும், அஜித்திற்கு ஜோடியாக யாரை நடிக்க வைப்பது என்று முடிவெடுக்கப்படாமல் இருந்தது. தற்போது வெளியான 'துணிவு' படத்தின் வெற்றியை தொடர்ந்து, அஜித்திற்கு இணையாக நடிகை ஐஸ்வர்யா ராய்-ஐ ஒப்பந்தம் செய்யலாம் என்ற பேச்சு அடிபட்டுள்ளது. இது குறித்து அதிகாரபூர்வ தகவல்கள் எதுவும் இன்னும் வெளியாகவில்லை. ஒருவேளை, ஐஸ்வர்யா ராய் இந்த படத்தில் நடித்தால், 23 வருடங்களுக்கு பிறகு இருவரும் மீண்டும் இணையும் படமாக இது அமையும்.
'கண்டுகொண்டேன் கண்டுகொண்டேன்' படத்திற்கு பிறகு இருவரும் இணையும் AK 62?
அஜித்தும், ஐஸ்வர்யா ராயும் இணைந்து, 'கண்டுகொண்டேன் கண்டுகொண்டேன்' என்ற திரைப்படத்தில் பணிபுரிந்துள்ளனர். இதில் அஜித்திற்கு ஜோடியாக தபுவும், ஐஸ்வர்யாவுக்கு ஜோடியாக மம்மூட்டியும் நடித்திருந்தனர். சென்ற 2000 ஆண்டில் வெளியான இந்த திரைப்படத்தை, ராஜிவ் மேனன் இயக்கி இருந்தார். A R ரஹ்மான் இசையமைப்பில் வெளியான அனைத்து பாடல்களும் தற்போது வரை பிரபலமாக உள்ளது. இந்நிலையில், AK62 -வில், நடிகர் அரவிந்த் ஸ்வாமியும், சந்தானமும் ஒரு முக்கிய கதாபாத்திரத்தில் நடிக்க உள்ளதாகவும் செய்திகள் தெரிவிக்கின்றன. விக்னேஷ் சிவனின் ஆஸ்தான இசையமைப்பாளரான அனிருத் தான், AK 62 -விற்கு இசையமைக்கிறார்.
