ரன்பீர் கபூர் - யாஷின் 'ராமாயணம்' ரிலீஸில் புதிய மாற்றம்! தீபாவளிக்கு முன்பே திரைக்கு வருகிறதா?
செய்தி முன்னோட்டம்
நமித் மல்ஹோத்ரா தயாரிப்பில், நிதேஷ் திவாரி இயக்கத்தில் பெரும் பொருட்செலவில் உருவாகி வரும் 'ராமாயணம்: பாகம் 1' திரைப்படத்தின் சர்வதேச வெளியீட்டுத் தேதிகள் குறித்த தகவல்கள் வெளியாகியுள்ளன. ரன்பீர் கபூர், யாஷ், சாய் பல்லவி மற்றும் சன்னி தியோல் உள்ளிட்ட பல முன்னணி நட்சத்திரங்கள் நடித்துள்ள இத்திரைப்படம் தீபாவளி பண்டிகையை குறிவைத்துத் திரைக்கு வரவுள்ளது. வழக்கமான தீபாவளி வெளியீட்டு நடைமுறையிலிருந்து மாறுபட்டு, இத்திரைப்படத்திற்கு இந்தியாவில் நவம்பர் 4 ஆம் தேதி (புதன்கிழமை) சிறப்பு பெயிட் பிரிவியூஸ் காட்சி திரையிடப்பட்டு, நவம்பர் 5 ஆம் தேதி அதிகாரப்பூர்வமாக திரையரங்குகளில் வெளியாகவுள்ளது. இந்தியாவில் தர்மா புரொடக்ஷன்ஸ் நிறுவனமும், சர்வதேச அளவில் சோனி பிக்சர்ஸ் நிறுவனமும் இப்படத்தின் விநியோக உரிமையைக் கைப்பற்றியுள்ளன.
வெளியீட்டுத் திட்டங்கள்
சர்வதேச சந்தைகளில் வெளியீட்டுத் திட்டங்கள்
உலகளாவிய வர்த்தகத்தை கருத்தில் கொண்டு பல்வேறு நாடுகளுக்கு ஏற்ப வெளியீட்டுத் தேதிகள் திட்டமிடப்பட்டுள்ளன.
வட அமெரிக்கா, ஆஸ்திரேலியா, நியூசிலாந்து, தென்கிழக்கு ஆசியா, ஜெர்மனி மற்றும் மத்திய கிழக்கு நாடுகளில் நவம்பர் 5 அன்றும், ஐக்கிய இராச்சியம் (UK), தென்னாப்பிரிக்கா ஆகிய நாடுகளில் நவம்பர் 6 வெள்ளிக்கிழமையும் படம் திரையிடப்பட உள்ளது.
சீனா, ஜப்பான் மற்றும் தென் கொரியா போன்ற கிழக்கு ஆசிய நாடுகளில் ரிலீஸ் தேதிகள் விரைவில் இறுதி செய்யப்படும் எனக் கூறப்பட்டுள்ளது.