"முறையான அரங்க நிகழ்வுகளில் நன்கு அலங்கரித்து வாருங்கள்" விஜய்க்கு ஜேம்ஸ் வசந்தனின் அட்வைஸ்
தளபதி விஜய் நடித்து பொங்கலுக்கு வெளிவர இருக்கும் படம் வாரிசு. இந்த படத்தின் இசை வெளியீட்டு விழா சமீபத்தில் நடைபெற்றது. நேரு உள்விளையாட்டு அரங்கில் நடைபெற்ற இந்த இசை வெளியீட்டு விழாவிற்கு விஜய் சாதாரண நபர் போல பங்கேற்றார். இந்நிலையில் நிகழ்ச்சி தொகுப்பாளர் மற்றும் இசையமைப்பாளரான ஜேம்ஸ் வசந்த் அவர்கள் விஜய்யின் தோற்றத்தை பற்றி தனது கருத்தினை சமூக வலைத்தளத்தில் பதிவிட்டுள்ளார். அதில் அவர், "வாரிசு பட விழா தொலைக்காட்சியில் போய்க்கொண்டிருந்தது. தற்செயலாக ஒரு கணம் எட்டிப்பார்த்தேன். விஜய் பேசிக்கொண்டிருந்தார். முதல் பார்வையிலேயே அவர் தோற்றம் மனதைச் சற்று நெருடியது. தலையை இன்னும் கொஞ்சம் சீர்படுத்தி, தாடியைக் கொஞ்சம் நெறிபடுத்தி, இந்த பிரம்மாண்ட விழாமேடைக்கேற்ற உடையணிந்திருக்கலாம் என்று தோன்றியது" என கூறியுள்ளார்.
சமூக வலைத்தளங்களில் வைரலாகும் ஜேம்ஸ் வசந்தனின்பதிவு
மேலும், "அவர் அதை எளிமை என்று நினைத்திருக்கலாம்; அல்லது அவர் ரசிகர் வாதிடலாம். Simplicity and appropriateness are two different things. எளிமையும், அவைப் பொருத்தமும் வெவ்வேறு விஷயங்கள். இதைப் பொதுவாகத்தான் சொல்கிறேன். ஹாலிவுட்டிலும் பாலிவுட்டிலும், ஆந்திராவிலும் கூட யாருமே இந்த விஷயத்தில் அலட்சியம் காட்டுவதில்லை. நட்சத்திரங்கள் வசதியானவர்கள் என்பது அனைவருக்கும் தெரிந்தது தானே யாரும் உங்களைத் தவறாக நினைக்கமாட்டார்கள். தன்னுடைய மனம் கவர்ந்த நாயகன் அழகாக வந்தால் முதலில் மகிழ்பவன் ரசிகன்தான்! முறையான அரங்க நிகழ்வுகளில் நன்கு அலங்கரித்து வாருங்கள். விடுமுறைகளில் மனம்போல் அணிந்து மகிழுங்கள். இந்த பழக்கத்தை உங்களைக் கண்மூடித்தனமாகப் பின்பற்றும் இளைஞருக்குக் கற்றுக்கொடுங்கள்" என அவர் பதிவிட்டுள்ளார்.
