நடிகர் வடிவேலுவின் சகோதரர் உடல்நலக்குறைவால் காலமானார்
நடிகர் வடிவேலு தமிழ் சினிமாவுலகில் டி.ராஜேந்தர் இயக்கத்தில் வெளியான 'என் தங்கை கல்யாணி' என்னும் திரைப்படம் மூலம் அறிமுகமானவர். பின்னர் 'தேவர் மகன்', 'ராசாவின் மனசிலே' உள்ளிட்ட படங்கள் மூலம் மக்களுக்கு அறியப்பட்டார். அதன் பின்னர் அவர் பல படங்களில் நகைச்சுவை கதாபாத்திரத்தில் நடித்து ரசிகர்கள் மனதில் நீங்கா இடம்பிடித்தார். இடையே சிறிது காலம் படங்களில் நடிக்காமல் இருந்த வடிவேலு அண்மையில் 'மாமன்னன்' என்னும் படத்தில் குணச்சித்திர கதாபாத்திரத்தில் நடித்திருந்தார். இப்படம் வெளியாகி மக்கள் மத்தியில் நல்ல வரவேற்பினையும் பெற்றுள்ளது என்பது குறிப்பிடவேண்டியவை. நடிகர் வடிவேலுவிற்கு மொத்தம் 3 தம்பிகள், 2 தங்கைகள், இவர்கள் அனைவரையும் மிகச்சிறப்பாக கவனித்து வந்துள்ளார் வடிவேலு.
சிம்பு அறிமுகமான 'காதல் அழிவதில்லை' உள்ளிட்ட 3 படங்களில் நடித்துள்ளார் ஜெகதீஸ்வரன்
அதுமட்டுமல்லாமல் அவர்கள் அனைவருக்கும் திருமணம் செய்து வைத்தவர் வடிவேலு தான் என்று அவரது சகோதரரான ஜெகதீஸ்வரன் ஓர் பேட்டியில் கூட கூறியிருப்பார். ஜெகதீஸ்வரன் சிம்பு அறிமுகமான 'காதல் அழிவதில்லை' உள்ளிட்ட 3 படங்களில் நடித்துள்ளாராம். பின்னர் சொத்துப்பிரச்சனை உள்ளிட்ட சில காரணங்களால் சினிமாவில் நடிப்பதை நிறுத்திய அவர், மதுரையில் ஜவுளி வியாபாரம் செய்து வந்துள்ளார். இந்நிலையில், கடந்த சிலநாட்களாக கல்லீரல் செயலிழப்பு காரணமாக மதுரை ஐராவதநல்லூரில் சிகிச்சை பெற்றுவந்த ஜெகதீஸ்வரன்(55) இன்று(ஆகஸ்ட்.,28) காலை காலமானார். தற்போது இவரது மறைவிற்கு சினிமா வட்டாரங்கள் மற்றும் வடிவேலு ரசிகர்கள் உள்ளிட்ட பலர் தங்கள் இரங்கலை தெரிவித்து வருகிறார்கள்.
