ஐடி பங்குகளால் சரிந்த தலால் ஸ்ட்ரீட்! சென்செக்ஸ், நிஃப்டி திடீர் வீழ்ச்சி! ஐடி துறையை உலுக்கிய அக்சென்சர் அறிக்கை
செய்தி முன்னோட்டம்
இந்தியப் பங்குச் சந்தை கடந்த ஐந்து வர்த்தக தினங்களாகத் தொடர்ந்து லாபப் பாதையில் பயணித்து வந்த நிலையில், வாரத்தின் இறுதி நாளான இன்று தலால் ஸ்ட்ரீட்டில் தகவல் தொழில்நுட்பத் துறை பங்குகள் கடுமையான விற்பனை அழுத்தத்தை சந்தித்தன. இதனால், கச்சா எண்ணெய் விலை வீழ்ச்சி மற்றும் சாதகமான உள்நாட்டுப் பொருளாதாரக் காரணிகள் இருந்தபோதிலும், இந்தியப் பங்குச்சந்தையில் பெரும் சரிவு ஏற்பட்டுள்ளது. இன்று காலை வர்த்தகத் தொடக்கத்திலேயே மும்பை பங்குச்சந்தை குறியீடான சென்செக்ஸ் மற்றும் தேசிய பங்குச்சந்தை குறியீடான நிஃப்டி ஆகிய இரண்டுமே 1 சதவீதத்திற்கு அருகில் சரிவடைந்தன.
விபரம்
ஒரே நாளில் சரிந்த சென்செக்ஸ், நிஃப்டி குறியீடுகள்
இன்று காலை 9:25 மணி நிலவரப்படி, பிஎஸ்இ சென்செக்ஸ் 724.34 புள்ளிகள் அல்லது 0.94% சரிந்து 76,685.64 புள்ளிகளாக வர்த்தகமானது. அதேபோல, என்எஸ்இ நிஃப்டி50 குறியீடு 201.70 புள்ளிகள் அல்லது 0.83% வீழ்ச்சியடைந்து, உளவியல் ரீதியாக முக்கிய அளவான 24,000 புள்ளிகளுக்குக் கீழ் சரிந்து 23,966.30 புள்ளிகளில் வர்த்தகத்தை மேற்கொண்டது. புவிசார் அரசியல் பதற்றங்கள் தணிந்தது மற்றும் கச்சா எண்ணெய் விலை குறைந்ததால் கடந்த ஐந்து நாட்களில் சென்செக்ஸ் 4.8 சதவீதமும், நிஃப்டி 4.3 சதவீதமும் உயர்ந்திருந்த நிலையில், இன்றைய சரிவு முதலீட்டாளர்களிடையே கலக்கத்தை ஏற்படுத்தியுள்ளது.
அக்சென்சர் அறிக்கை
ஐடி பங்குகளை உலுக்கிய அக்சென்சர் அறிக்கை
பங்குச்சந்தையின் இன்றைய வீழ்ச்சிக்குத் தொழில்நுட்பத் துறையே முதன்மைக் காரணமாக அமைந்தது. உலகளாவிய ஐடி பிராண்டான அக்சென்சர் நிறுவனம் தனது சமீபத்திய வருவாய் அறிக்கையில், சர்வதேச அளவில் நிறுவனங்களின் தொழில்நுட்பச் செலவினங்கள் குறைய வாய்ப்புள்ளதாக எச்சரித்துள்ளது. இதனால் இந்திய ஐடி நிறுவனங்களின் எதிர்கால வளர்ச்சி பாதிக்கப்படலாம் என்ற கவலையில் முதலீட்டாளர்கள் பங்குகளை வேகமாக விற்பனை செய்யத் தொடங்கினர். இதன் காரணமாக இன்ஃபோசிஸ் 7.84% சரிந்து சென்செக்ஸ் பட்டியலில் பெரும் நஷ்டத்தை சந்தித்தது. டிசிஎஸ் 5.91% சரிவைச் சந்தித்தது. டெக் மஹிந்திரா 5.51% வீழ்ச்சியடைந்தது. ஹெச்சிஎல் டெக் 5.13% சரிந்தது.
பொருளாதார சூழல்
சாதகமான பொருளாதாரச் சூழலிலும் சரிந்த சந்தை
அமெரிக்கா-ஈரான் இடையேயான அமைதி ஒப்பந்தத்திற்குப் பிறகு, கச்சா எண்ணெய் விலை பல மாதங்களில் இல்லாத அளவிற்குச் சரிந்து இந்தியாவிற்கான பணவீக்கக் கவலைகளைக் குறைத்துள்ளது. மேலும், அந்நிய நிறுவன முதலீட்டாளர்களின் பங்கு விற்பனை வேகம் குறைந்துள்ளதுடன், வங்கிப் பங்குகளின் மீட்பும் சந்தைக்குச் சாதகமாகவே உள்ளன. இதுகுறித்து ஜியோஜித் இன்வெஸ்ட்மென்ட்ஸ் நிறுவனத்தின் தலைமை சந்தை உத்தி நிபுணர் டாக்டர் வி.கே.விஜயகுமார் கூறுகையில், "மேக்ரோ பொருளாதாரக் காரணிகள் மற்றும் கச்சா எண்ணெய் விலை சரிவு ஆகியவை சந்தையின் அடிப்படை கட்டமைப்பிற்கு வலுவூட்டுகின்றன. தற்போதைய சரிவு தற்காலிகமானது" என்று தெரிவித்துள்ளார்.
பொதுத்துறை பங்குகள்
சரிவிலும் மீண்ட வங்கி மற்றும் பிற பொதுத்துறை பங்குகள்
ஐடி பங்குகள் கடுமையான வீழ்ச்சியைச் சந்தித்த போதிலும், சந்தையின் சில குறிப்பிட்ட துறைகள் நிலையான செயல்திறனை வெளிப்படுத்தின. குறிப்பாக, என்டிபிசி 1.01%, சன் பார்மா 0.60%, பவர் கிரிட் 0.49%, ட்ரெண்ட் 0.42% மற்றும் பார்தி ஏர்டெல் 0.42% என்ற அளவில் லாபத்தில் வர்த்தகமாகின. மேலும், இன்று நடைபெறவுள்ள ரிலையன்ஸ் இண்டஸ்ட்ரீஸ் நிறுவனத்தின் ஆண்டுப் பொதுக் கூட்டத்தில் புதிய எரிசக்தி திட்டங்கள் மற்றும் ஜியோ ஐபிஓ காலக்கெடு குறித்த முக்கிய அறிவிப்புகள் வெளியாகலாம் என்பதால், ரிலையன்ஸ் நிறுவனப் பங்குகளும் சாதகமான எல்லையிலேயே வர்த்தகமாகி வருகின்றன.