உலக சந்தைகள் சரிந்தாலும் சென்செக்ஸ் 1,700 புள்ளிகள் உயர்வு: பின்னணி காரணங்கள் என்ன?
செய்தி முன்னோட்டம்
அமெரிக்க பங்குச் சந்தையில் ஏற்பட்ட தொழில்நுட்ப பங்குகளின் வீழ்ச்சி காரணமாக ஆசிய சந்தைகளான தென்கொரியா மற்றும் ஜப்பான் பங்குச் சந்தைகள் கடும் சரிவை சந்தித்தன. இருப்பினும் இந்திய பங்குச் சந்தைகளான சென்செக்ஸ் மற்றும் நிஃப்டி ஆகியவை முதலீட்டாளர்களின் பெரும் வரவேற்பால் சுமார் 1,700 புள்ளிகள் வரை உயர்ந்து மீட்சியைக் கண்டுள்ளன. சென்செக்ஸ் 1,030 புள்ளிகள் உயர்ந்து 80,340 நிலையைத் தாண்டிய நிலையில், நிஃப்டி 256 புள்ளிகள் உயர்ந்து 24,793 புள்ளிகளில் நிலைபெற்று வர்த்தகமானது.
வெளிநாட்டு நிதி
அந்நிய நிறுவன முதலீட்டாளர்களின் நிதி வரத்து அதிகரிப்பு
இந்திய பங்குச் சந்தையின் இந்த திடீர் ஏற்றத்திற்கு அந்நிய நிறுவன முதலீட்டாளர்கள் (FIIs) மீண்டும் இந்திய பங்குகளை தீவிரமாக வாங்கத் தொடங்கியதே முதன்மைக் காரணமாகும்.
உள்நாட்டு நிறுவன முதலீட்டாளர்கள் (DIIs) பங்குகளை விற்று லாபம் பார்த்தபோதிலும், கடந்த ஐந்து வர்த்தக தினங்களில் மட்டும் அந்நிய நிறுவன முதலீட்டாளர்கள் ₹35,781 கோடிக்கும் அதிகமான பங்குகளை வாங்கியுள்ளனர்.
நவம்பர் 5 அன்று மட்டும் அந்நிய நிறுவன முதலீட்டாளர்கள் ₹14,974 கோடி மதிப்பில் இந்திய பங்குகளை நிகர அடிப்படையில் வாங்கி சந்தைக்கு பலமான ஆதரவை வழங்கியுள்ளனர்.
இந்திய சந்தை
அமெரிக்க ஏஐ தொழில்நுட்ப வீழ்ச்சியால் இந்திய சந்தைக்குக் கிடைத்த நன்மை
அமெரிக்க இடைக்காலத் தேர்தல் முடிவுகளுக்குப் பிறகு ஏஐ மற்றும் தரவு மைய உள்கட்டமைப்பு மீதான கட்டுப்பாடுகள் அதிகரிக்கும் என்ற பயத்தால் அந்நாட்டு தொழில்நுட்ப பங்குகள் கடும் வீழ்ச்சியை சந்தித்தன.
இந்திய பங்குச் சந்தை குறியீடுகளில் ஏஐ மற்றும் செமிகண்டக்டர் சார்ந்த நிறுவனங்களின் ஆதிக்கம் குறைவாக உள்ளதால், உலகளாவிய முதலீட்டாளர்கள் தங்களது நிதியை பாதுகாப்பான இந்திய சந்தைகளை நோக்கி நகர்த்தத் தொடங்கியுள்ளனர்.
மேலும் இந்திய நிறுவனங்களின் இரண்டாம் காலாண்டு நிதி முடிவுகள் எதிர்பார்ப்பை விட சிறப்பாக அமைந்துள்ளதும் இந்த சந்தை உயர்விற்கு கூடுதல் பலம் சேர்த்துள்ளது.
வர்த்தக நிலவரங்கள்
முன்னணி லார்ஜ்கேப் பங்குகள் மற்றும் துறை சார்ந்த வர்த்தக நிலவரங்கள்
இந்த சந்தை உயர்வு பரவலாக இல்லாமல் முன்னணி லார்ஜ்கேப் நிறுவனங்களின் பங்குகளாலேயே சாத்தியமானது.
மஹிந்திரா அண்ட் மஹிந்திரா பங்கு 5%-க்கும் அதிகமாக உயர்ந்த நிலையில், டைட்டன், டிசிஎஸ், எச்டிஎஃப்சி வங்கி, இன்ஃபோசிஸ் மற்றும் ஹெச்டிஎல் டெக்னாலஜிஸ் ஆகிய பங்குகள் 1.5%-க்கும் மேல் உயர்ந்து சந்தையை ஏற்றி சென்றன.
இருப்பினும், கச்சா எண்ணெய் விலை பேரலுக்கு $99.89 ஆக உயர்ந்துள்ளது மற்றும் இந்தியா விஐஎக்ஸ் 8% வரை அதிகரித்துள்ளது போன்றவை எதிர்கால சந்தை அபாயங்களாகப் பார்க்கப்படுகின்றன.