இந்தியாவின் அந்நியச் செலாவணி கையிருப்பு $717 பில்லியனாகக் குறைவு; ஆர்பிஐ தகவல்

எழுதியவர் Sekar Chinnappan

Nov 06, 2026

06:06 pm

செய்தி முன்னோட்டம்

இந்திய ரிசர்வ் வங்கி (ஆர்பிஐ) வெளியிட்டுள்ள சமீபத்திய பொருளாதாரத் தரவுகளின்படி, அக்டோபர் 30, 2026 உடனுடன் முடிந்த வாரத்தில் நாட்டின் அந்நியச் செலாவணி கையிருப்பு 2.691 பில்லியன் அமெரிக்க டாலர்கள் குறைந்துள்ளது. இதன் மூலம் இந்தியாவின் மொத்த அந்நியச் செலாவணி கையிருப்புத் தொகை 717.056 பில்லியன் டாலர்களாக சரிவடைந்துள்ளது. இதற்கு முந்தைய வாரத்தில் $719.748 பில்லியனாக இருந்த கையிருப்புத் தொகை, தற்போது மேலும் சரிவை சந்தித்துள்ளது கவனத்தைப் பெற்றுள்ளது.

டாலர் விற்பனை

வெளிநாட்டு நாணய சொத்துகள் மற்றும் ஆர்பிஐயின் டாலர் விற்பனை

அந்நியச் செலாவணி கையிருப்பின் முதன்மை அங்கமாகக் கருதப்படும் வெளிநாட்டு நாணய சொத்துகள் (FCA) இந்த வாரத்தில் 2.088 பில்லியன் டாலர்கள் சரிந்து 591.118 பில்லியன் டாலர்களாக மாறியுள்ளது.

சர்வதேச நிதி சந்தையில் அமெரிக்க டாலருக்கு எதிரான இந்திய ரூபாயின் மதிப்பைக் கட்டுப்படுத்தவும், ரூபாயின் கடுமையான வீழ்ச்சியைத் தடுக்கவும் ஆர்பிஐ மேற்கொண்டு வரும் டாலர் விற்பனை நடவடிக்கைகளே இந்த சரிவுக்கு முதன்மைக் காரணமாக அமைந்ததாக பொருளாதார வல்லுநர்கள் தெரிவித்துள்ளனர்.

தொடர்ந்து சரிவு

வரலாற்று உச்சத்திற்குப் பிறகு தொடர்ந்து சரியும் அந்நிய நிதி கையிருப்பு

கடந்த செப்டம்பர் 4, 2026 உடனுடன் முடிந்த வாரத்தில் இந்தியாவின் அந்நியச் செலாவணி கையிருப்பு 785.706 பில்லியன் அமெரிக்க டாலர்கள் என்ற வரலாற்று சிறப்புமிக்க உச்சத்தைத் தொட்டு சாதனை படைத்திருந்தது.

வெளிநாடுவாழ் இந்தியர்களின் வைப்புநிதிகள் மற்றும் சலுகை முறை ஸ்வாப் திட்டங்கள் மூலம் பெறப்பட்ட நிதி காரணமாக அந்த சாதனை சாத்தியமானது.

இருப்பினும், அந்த காலக்கட்டத்திற்குப் பிறகு தொடர்ந்து நிலவி வரும் உலகளாவிய பொருளாதார மாற்றங்களால் கையிருப்புத் தொகை படிப்படியாகக் குறைந்து வருகிறது.

பாதுகாப்பு நடவடிக்கை

சந்தை பாதிப்புகளும் ரிசர்வ் வங்கியின் எதிர்காலப் பாதுகாப்பு நடவடிக்கைகளும்

கச்சா எண்ணெய் விலையின் ஏற்ற இறக்கங்கள் மற்றும் வெளிநாட்டு முதலீடுகளின் வெளியேற்றம் ஆகிய சவால்களுக்கு மத்தியில், அந்நியச் செலாவணி கையிருப்பு நாட்டின் இறக்குமதி மற்றும் வெளிநாட்டு செலுத்தல்களுக்கு முக்கியப் பாதுகாப்பாகத் திகழ்கிறது.

தற்போதைய கையிருப்பு சரிவு ஏற்பட்டபோதிலும், நாட்டின் பொருளாதார ஸ்திரத்தன்மையைப் பேண ஆர்பிஐ தகுந்த நடவடிக்கைகளைத் தொடர்ந்து எடுத்து வருகிறது.

சர்வதேச சந்தையின் அமெரிக்க டாலர் மற்றும் பிற முக்கிய நாணயங்களின் மதிப்பு மாற்றங்களும் இந்த கையிருப்பு மதிப்பீட்டில் பிரதிபலிக்கின்றன.