முதலீட்டாளர்கள் அதிர்ச்சி! 1,018 புள்ளிகள் சரிந்த சென்செக்ஸ்; வளைகுடா போர் பதற்றத்தால் ரத்தக் களறியான இந்திய பங்குச்சந்தை
செய்தி முன்னோட்டம்
இந்தியப் பங்குச் சந்தைகள் இன்று (மார்ச் 30) வாரத்தின் முதல் நாளிலேயே மிகப்பெரிய சரிவுடன் தொடங்கியுள்ளன. மத்திய கிழக்கு நாடுகளில் நிலவும் போர் பதற்றம் மற்றும் கச்சா எண்ணெய் விலை உயர்வு காரணமாக உலகளாவிய சந்தைகளில் நிலவும் மந்தநிலை இந்தியச் சந்தையையும் கடுமையாகப் பாதித்துள்ளது. வர்த்தகத் தொடக்கத்திலேயே மும்பை பங்குச்சந்தை குறியீட்டு எண்ணான சென்செக்ஸ் 1,018 புள்ளிகள் சரிந்து 72,565 என்ற நிலையை எட்டியது. அதேபோல், தேசிய பங்குச் சந்தை குறியீட்டு எண்ணான நிஃப்டி 269 புள்ளிகள் குறைந்து 22,549 என்ற நிலைக்குச் சென்றது.
சந்தை நிலவரம்
நிபுணர்களின் கணிப்பு மற்றும் சந்தை நிலவரம்
பங்குச்சந்தை நிபுணர்களின் கூற்றுப்படி, நிஃப்டி 23,000 மற்றும் சென்செக்ஸ் 74,500 ஆகிய நிலைகள் தற்போது வலுவான தடையாக இருக்கும். சந்தை இந்த நிலைக்குக் கீழே இருக்கும் வரை பலவீனம் தொடர வாய்ப்புள்ளது. நிஃப்டி 22,200 மற்றும் சென்செக்ஸ் 72,100 என்ற நிலைகள் வரை சந்தை சரிய வாய்ப்புள்ளது என்று நிபுணர்கள் எச்சரிக்கின்றனர். சென்செக்ஸ் பட்டியலில் உள்ள 30 பங்குகளுமே இன்று சிவப்பு நிறத்தில் (சரிவில்) வர்த்தகமாகி வருவது குறிப்பிடத்தக்கது.
காரணங்கள்
கச்சா எண்ணெய் மற்றும் உலகளாவிய காரணங்கள்
அமெரிக்கா மற்றும் ஈரான் இடையிலான போர் தீவிரமடைந்து வருவது உலகளவில் கச்சா எண்ணெய் விநியோகத்தைப் பாதிக்கும் என்ற அச்சம் எழுந்துள்ளது. இதனால் எண்ணெய் விலை உயர்ந்து வருவது ஆசிய சந்தைகளிலும் பெரும் தாக்கத்தை ஏற்படுத்தியுள்ளது. ஜப்பானின் நிக்கி 3.68 சதவீதமும், ஹாங்காங்கின் ஹாங் செங் 1.07 சதவீதமும் சரிவைக் கண்டுள்ளன. இந்த உலகளாவிய எதிர்மறைச் சூழலே இந்திய சந்தையின் கேப்-டவுன் (Gap-down) தொடக்கத்திற்கு முக்கியக் காரணமாக அமைந்தது.
வெளியேற்றம்
முதலீட்டாளர்களின் வெளியேற்றம்
வெளிநாட்டு நிறுவன முதலீட்டாளர்கள் தொடர்ந்து இந்தியச் சந்தையிலிருந்து தங்கள் முதலீடுகளைத் திரும்பப் பெற்று வருகின்றனர். கடந்த மார்ச் 27 அன்று மட்டும் ₹4,367 கோடி மதிப்பிலான பங்குகளை அவர்கள் விற்றுள்ளனர். அதே சமயம், உள்நாட்டு நிறுவன முதலீட்டாளர்கள் சுமார் ₹3,566 கோடி மதிப்பிலான பங்குகளை வாங்கிச் சந்தையை ஓரளவுக்கு முட்டுக்கொடுத்துத் தாங்கிப் பிடிக்க முயன்றனர். இருப்பினும், கிஃப்ட் நிஃப்டி காட்டிய 328 புள்ளிகள் சரிவே இன்றைய வீழ்ச்சியை முன்கூட்டியே உறுதி செய்தது.
பங்குகள்
மிட்கேப் மற்றும் ஸ்மால்கேப் பங்குகளின் நிலை
முக்கியக் குறியீடுகள் மட்டுமன்றி, நடுத்தர மற்றும் சிறிய நிறுவனப் பங்குகளும் இன்று பலத்த சரிவைச் சந்தித்துள்ளன. பிஎஸ்இ மிட்கேப் குறியீடு 1.90 சதவீதமும், ஸ்மால்கேப் குறியீடு 1.99 சதவீதமும் சரிந்துள்ளன. என்எஸ்இயில் 2,156 பங்குகளின் விலை சரிந்துள்ள நிலையில், வெறும் 466 பங்குகளின் விலை மட்டுமே உயர்வுடன் காணப்படுகிறது. ஆக்சிஸ் வங்கி, கோடக் வங்கி மற்றும் ஸ்டேட் பேங்க் ஆஃப் இந்தியா போன்ற வங்கிப் பங்குகள் இன்றைய சரிவில் முன்னிலை வகிக்கின்றன.