ஜிம்பாப்வே விமான விபத்தில் உயிரிழந்த இந்திய தொழிலதிபர் ஹார்பால் ரந்தாவா
செய்தி முன்னோட்டம்
இந்திய பணக்காரர்களுள் ஒருவரும் சுரங்கத் தொழில் அதிபருமான ஹார்பால் ரந்தாவா, ஜிம்பாப்வேயில் நிகழ்ந்த விமான விபத்தில் உயிரிழந்திருப்பதாகத் தகவல் வெளியாகியிருக்கிறது.
கடந்த செப்டம்பர் 29ம் தேதி தன்னுடைய தனிப்பட்ட விமானத்தில் பயணம் செய்து கொண்டிருந்த போது, தென்மேற்கு ஜிம்பாப்வே பகுதியில் உள்ள வைர சுரங்கத்திற்கு அருகில் தொழில்நுட்ப கோளாறு காரணமாக விமானம் விபத்துக்குள்ளாகியிருக்கிறது.
அவர் மட்டுமின்றி, அவருடன் பயணம் செய்த அவருடைய மகன் அமெர் காபிர் சிங் ரந்தாவா மற்றும் உடன் சென்ற ஊழியர்கள் நால்வருடன் சேர்த்து மொத்தம் 6 பேர் சம்பவ இடத்திலேயே உயிரிழந்ததாகக் கூறப்படுகிறது.
இந்த துயரச் சம்பவம் குறித்து ஹார்பால் ரந்தாவாவின் நண்பரும், திரைப்பட இயக்குநருமான ஜிம்பாப்வேயைச் சேர்ந்த ஹோப்வெல் சினோனா தன்னுடைய ட்விட்டர் பக்கத்தில் பதிவொன்றைப் பகிர்ந்திருக்கிறார்.
இந்தியா
ஹார்பால் ரந்தாவா யார்?
பல்வேறு வகையான சுரங்கத் தொழில்களில் ஈடுபட்டு வரும் ஜிம்பாப்வேயைச் சேர்ந்த ரியோஜிம் நிறுவனத்தின் உரிமையாளர் ஹார்பால் ரந்தாவா. இந்த நிறுவனமானது தங்கம் மற்றும் நிலகரியை உற்பத்தி செய்வதோடு, நிக்கல் மற்றும் காப்பரின் சுத்திகரிப்பையும் மேற்கொண்டு வருகிறது.
தனியார் பங்கு வணிக நிறுவனமான ஜெம் ஹோண்டிங்ஸ் என்ற 4 பில்லியன் டாலர்கள் மதிப்பைக் கொண்ட நிறுவனத்தையும் நிறுவியிருக்கிறார் ஹார்பால் ரந்தாவா.
ஜிம்பாப்வேயில் உள்ள தன்னுடைய சுரங்கங்களுள் ஒன்றான முரோவா வைரச் சுரங்கத்திற்கு விமானத்தில் சென்று கொண்டிருந்த போது தான் இந்த விபத்து நிகழ்ந்திருக்கிறது. இந்த விமான விபத்து குறித்து அந்நாட்டு காவல்துறையினர் விசாரணை மேற்கொண்டு வருகின்றனர்.