புற்றுநோய் மருந்துகளின் விலை 70% வரை குறைகிறது: வர்த்தக லாப வரம்பிற்கு மத்திய அரசு 30% கட்டுப்பாடு

எழுதியவர் Venkatalakshmi V

Oct 09, 2026

01:03 pm

செய்தி முன்னோட்டம்

இந்தியாவில் புற்றுநோய் மருந்துகளின் அதிகப்படியான விலையை கட்டுப்படுத்தும் வகையில், பட்டியலிடப்படாத புற்றுநோய் மருந்துகளின் வர்த்தக லாப வரம்பை 30%ஆகக் குறைக்க மத்திய அரசு ஒப்புதல் அளித்துள்ளது. இத்தீர்மானத்தின் மூலம் புற்றுநோய் மருந்துகளின் MRP 70% வரை குறையும் என்றும், நோயாளிகளுக்கு ஆண்டுதோறும் ரூ.2,500 கோடி வரை சேமிப்பு ஏற்படும் என்றும் எதிர்பார்க்கப்படுகிறது. தேசிய மருந்து விலை நிர்ணய ஆணையம் நடத்திய ஆய்வில், பட்டியலிடப்படாத புற்றுநோய் மருந்துகள் சராசரியாக 170% வரையிலும், சில குறிப்பிட்ட மருந்துகளுக்கு 700% அல்லது அதற்கு மேலும் லாப வரம்பு வைத்து விற்கப்படுவது கண்டறியப்பட்டது. இதனைக் கட்டுப்படுத்த, DGHS குழு எந்தெந்த மருந்துகள் இக்கட்டுப்பாட்டின் கீழ் கொண்டுவரப்பட வேண்டும் என்பதை இறுதி செய்யும். அதனைத்தொடர்ந்து NPPA அதிகாரப்பூர்வ அறிவிப்பை வெளியிடும்.

நடவடிக்கை

2019-ஆம் ஆண்டு நடவடிக்கையின் தொடர்ச்சி

முன்னதாக 2019-ஆம் ஆண்டு, 42 வகையான பட்டியலிடப்படாத புற்றுநோய் மருந்துகளுக்கு 30% வர்த்தக லாப வரம்பை NPPA அமல்படுத்தியது.

அந்த நடவடிக்கையின் மூலம் 526 பிராண்டுகளின் MRP விலை 91% வரை குறைந்து, நோயாளிகளுக்கு ஆண்டுக்கு ரூ.984 கோடி சேமிப்பு கிடைத்தது.

தற்போது கொண்டுவரப்பட்டுள்ள புதிய விரிவாக்கப்பட்ட நடவடிக்கையில், உள்நாட்டு மற்றும் இறக்குமதி செய்யப்பட்ட மருந்துகள், பிராண்டட் மற்றும் ஜெனரிக் மருந்துகள், காப்புரிமை பெற்ற மற்றும் காப்புரிமை பெறாத மருந்துகள் உட்பட அனைத்து வகைகளும் அடங்கும்.

விலைக் குறைப்பு நடவடிக்கை காரணமாக சந்தையில் புற்றுநோய் மருந்துகளுக்குத் தட்டுப்பாடு ஏற்படுவதைத் தவிர்க்க, மருந்து உற்பத்தி நிறுவனங்கள் தங்களின் தற்போதைய உற்பத்தியை அதே அளவில் தொடர்ந்து பராமரிக்க வேண்டும் என மத்திய மருந்தகத் துறை உத்தரவிட்டுள்ளது.