இரண்டு ஆண்டுகள் காத்திருப்புக்குப் பின்பு அறிமுகமான 'டெஸ்லா சைபர்டிரக்'
செய்தி முன்னோட்டம்
2019ம் ஆண்டு கான்செப்ட் மாடலாக அறிமுகமான டெஸ்லா சைபர்டிரக்கானது (Cybertruck) இரண்டு ஆண்டு கால காத்திருப்புக்குப் பின்பு இறுதியாக தற்போது அதிகாரப்பூர்வமாக அறிமுகப்படுத்தப்பட்டிருக்கிறது.
இந்த டெஸ்லா சைபர்டிரக் பிக்-அப்பின் தயாரிப்பு வடிவத்தை அமெரிக்காவின் டெக்சாஸ் மாகாணத்திலுள்ள கிகா ஆஸ்டின் தொழிற்சாலையில் காட்சிப்படுத்தியிருந்தது அந்நிறுவனம். தங்களுடைய புதிய சைபர்டிரக்கின் முதல் 10 யூனிட்டுகளை தங்களுடைய ஊழியர்களுக்கு டெலிவரி செய்திருக்கிறது அந்நிறுவனம்.
சிங்கிள் எலெக்ட்ரிக் மோட்டார், இரண்டு எலெக்ட்ரிக் மோட்டார்கள் மற்றும் மூன்று எலெக்ட்ரிக் மோட்டார்கள் என மூன்று விதமான பவர்ட்ரெயின் தேர்வுகளில் அறிமுகமாகியிருக்கிறது டெஸ்லாவின் புதிய சைபர்டிரக்.
இவற்றில் இரண்டு மோட்டார்கள் கொண்ட வேரியன்டானது ஆல் வீல் டிரைவாக இருக்கும் நிலையில், மூன்று மோட்டார்கள் கொண்ட வேரியன்டை சைபர்பீஸ்ட் என அழைக்கின்றனர்.
டெஸ்லா
டெஸ்லா சைபர்டிரக்: பவர் மற்றும் ரேஞ்சு
மேற்கூறிய மூன்று வேரியன்ட்களில், மூன்று எலெக்ட்ரிக் மோட்டார்கள் கொண்ட வேரியன்டானது 845hp பவரை வெளிப்படுத்தும் திறனைக் கொண்டிருக்கிறது. மேலும், இந்த வேரியன்டானது 515 கிமீ ரேஞ்சையும் கொண்டிருக்கிறது.
இரண்டு எலெக்ட்ரிக் மோட்டார்கள் கொண்ட சைபர்டிரக் வேரியன்டானது 600hp பவரையும், 547 கிமீ ரேஞ்சையும் கொண்டிருக்கிறது. இந்த மூன்று வேரியன்டிகளில் அதிக ரேஞ்சைக் கொண்டிருக்கும் வேரியன்ட் இது தான்.
ஒரே ஒரு எலெக்ட்ரிக் மோட்டார் கொண்ட அடிப்படை சைபர்டிரக் வேரியன்டின் பவர் மற்றும் ரேஞ்சு குறித்த தகவல்களை, டெஸ்லாவோ, எலான் மஸ்க்கோ பகிர்ந்து கொள்ளவில்லை. எனினும், அந்த அடிப்படை வேரியன்டானது 402 கிமீ ரேஞ்சைக் கொண்டிருக்கும் என எதிர்பார்க்கப்படுகிறது.
ஆட்டோமொபைல்
டெஸ்லா சைபர்டிரக்: விலை
அதிக செயல்திறன் கொண்ட அடிப்படை எலெக்ட்ரிக் பிக்-அப்பான, ஒரெயொரு எலெக்ட்ரிக் மோட்டார் கொண்ட சைபர்டிரக்கானது 60,990 டாலர்கள் (இந்திய மதிப்பில் ரூ.50.8 லட்சம்) விலையில் அறிமுகப்படுத்தப்பட்டிருக்கிறது.
தற்போதே அறிமுகப்படுத்தப்பட்டிருக்கிறது தான் என்றாலும், இந்த அடிப்படைய வேரியன்டை 2025ம் ஆண்டே வெளியிடத் திட்டமிட்டிருக்கிறது டெஸ்லா.
ஆல் வீல் டிரைவ் மற்றும் டூயல் எலெக்டரிக் மோட்டார்கள் கொண்ட மாடலை 79,990 டாலர்கள் (இந்திய மதிப்பில் ரூ.66.63 லட்சம்) விலையிலும், டாப் எண்டான மூன்று எலெக்ட்ரிக் மோட்டார்கள் கொண்ட சைபர்பீஸ்டை 99,990 டாலர்கள் (இந்திய மதிப்பில் ரூ.83.29 லட்சம்) விலையிலும் அறிமுகப்படுத்தியிருக்கிறது டெஸ்லா.
அடிப்படை வேரின்யடை தவிர்த்து மேற்கூறிய இரண்டு வேரியன்ட்களின் டெலிவரியையும் அடுத்த ஆண்டு தொடங்க திட்டமிட்டிருக்கிறது டெஸ்லா.