முன்பதிவு தொடங்கிய சில நாட்களிலேயே விற்றுத் தீர்ந்தது ஸ்கோடா ஆக்டேவியா ஆர்எஸ் 2025
செய்தி முன்னோட்டம்
செயல்திறன் மிக்க புதிய ஸ்கோடா ஆக்டேவியா ஆர்எஸ் 2025 காருக்கான முன்பதிவு தொடங்கிய சில நாட்களிலேயே, இந்தியாவிற்கு ஒதுக்கப்பட்ட 100 யூனிட்களும் விற்றுத் தீர்ந்துவிட்டன. அக்டோபர் 17 அன்று அதிகாரப்பூர்வமாக வெளியிடுவதற்கு முன்னதாக, ₹2.50 லட்சம் செலுத்தி முன்பதிவு செயல்முறை தொடங்கப்பட்டது. விற்றுத் தீர்ந்த இந்தக் கார்களின் விநியோகம் நவம்பர் மாதத்தில் தொடங்கும் என எதிர்பார்க்கப்படுகிறது. முழுவதும் வெளிநாட்டிலிருந்து இறக்குமதி செய்யப்படும் (CBU) இந்தக் கார், சுமார் ₹50 லட்சம் விலையில் இருக்கும் எனக் கணிக்கப்பட்டுள்ளது. ஆக்டேவியா ஆர்எஸ் தனது ஸ்போர்ட்டியான தோற்றத்தால் தனித்து நிற்கிறது. இதில் எல்இடி மேட்ரிக்ஸ் ஹெட்லைட்கள், 18 அங்குல அலாய் வீல்கள் மற்றும் டைனமிக் பாடி அமைப்பு ஆகியவை உள்ளன.
முக்கிய அம்சங்கள்
மாடலின் முக்கிய அம்சங்கள்
உட்புறத்தில் ஸ்போர்ட்ஸ் இருக்கைகள் மற்றும் பெரிய 13 அங்குல டச்ஸ்கிரீன் இன்ஃபோடெயின்மென்ட் சிஸ்டம் ஆகியவை இடம்பெற்றுள்ளன. இந்த செடான் காருக்கு, சக்திவாய்ந்த 2.0 லிட்டர் டிஎஸ்ஐ பெட்ரோல் என்ஜின் பொருத்தப்பட்டுள்ளது. இது 216 hp சக்தியையும், 370 Nm உச்ச டார்க்கையும் வழங்குகிறது. இதன் மூலம் இந்தக் கார் மணிக்கு 0வில் இருந்து 100 கிமீ வேகத்தை வெறும் 6.4 வினாடிகளில் எட்ட முடியும். இதன் அதிகபட்ச வேகம் 250 கிமீ/மணி என மின்னணு முறையில் கட்டுப்படுத்தப்பட்டுள்ளது. வழக்கமான மாடலை விட ஆர்எஸ் மாடல் 15 மிமீ குறைவாகத் தரையை ஒட்டி அமைந்திருப்பது இந்த வாகனத்தின் ஸ்போர்ட்டி தன்மையை மேலும் மேம்படுத்துகிறது.