6 நிமிடத்தில் அனைத்து பைக்குகளை விற்பனை; சாதனை படைத்த ராயல் என்ஃபீல்டு கிளாசிக் 650 ஹைப்பர்ஷிப்ட்

எழுதியவர் Sekar Chinnappan

Nov 02, 2026

03:26 pm

செய்தி முன்னோட்டம்

ராயல் என்ஃபீல்டு நிறுவனத்தின் 125-வது ஆண்டு நிறைவு விழாவை முன்னிட்டு கிளாசிக் 650 ஹைப்பர்ஷிப்ட் என்ற சிறப்புப் பதிப்பு மாடல் பைக் இந்தியாவில் அறிமுகம் செய்யப்பட்டது. இந்திய சந்தைக்காக ஒதுக்கப்பட்ட 125 பைக்குகளுக்கான ஆன்லைன் விற்பனை தொடங்கிய வெறும் 6 நிமிடங்களிலேயே அனைத்து பைக்குகளும் முன்பதிவு செய்யப்பட்டு சாதனை படைத்துள்ளன. அக்டோபர் 16 முதல் அக்டோபர் 28 வரை பதிவு செய்த வாடிக்கையாளர்களிடையே இத்தகைய கடுமையான போட்டி நிலவியது.

125 ஆண்டு நினைவு

வண்ணமயமான வடிவமைப்பு மற்றும் பிரத்யேக 125-வது ஆண்டு சின்னம்

இந்த ஹைப்பர்ஷிப்ட் மாடலின் முதன்மை அம்சமாக அதன் பிரத்யேக கலர் ஸ்கீம் அமைந்துள்ளது.

பைக் மீது வெளிச்சம் விழும்போது சிவப்பு, பச்சை மற்றும் தங்க நிறங்களாக மாறும் விசேஷ வண்ணப்பூச்சு இதில் பயன்படுத்தப்பட்டுள்ளது.

மேலும், டேங்க் மற்றும் பக்கவாட்டு பேனல்களில் '125 Years' என்ற பிரத்யேக சின்னமும், கையால் வரையப்பட்ட பின்ஸ்ட்ரைப்களும் சேர்க்கப்பட்டுள்ளன.

இதன் இன்ஜின் மற்றும் மெக்கானிக்கல் அமைப்புகள் வழக்கமான கிளாசிக் 650 மாடலைப் போன்றே தொடர்கின்றன.

சக்திவாய்ந்த இன்ஜின்

சக்திவாய்ந்த 648சிசி இன்ஜின் மற்றும் சிறந்த மெக்கானிக்கல் அமைப்பு

இந்த பைக்கில் 648சிசி ஏர்/ஆயில்-கூல்டு பேரலல்-ட்வின் இன்ஜின் பொருத்தப்பட்டுள்ளது.

இது 47hp ஆற்றலையும் 52.3Nm டார்க் திறனையும் வழங்கி தடையற்ற பயண அனுபவத்தைத் தரும்.

சூப்பர் மீட்டியார் 650 பைக்கின் சேஸியஸைப் பயன்படுத்தினாலும், முன்பக்கத்தில் வழக்கமான RSU ஃபோர்க்குகள் கொடுக்கப்பட்டுள்ளன.

இன்டர்செப்டர் 650 போன்றே இதன் ஆற்றல் வெளியீடு இருந்தாலும், தோற்றத்தில் இது ராயல் என்ஃபீல்டின் பழமையான பாரம்பரிய கம்பீரத்தை முழுமையாகப் பிரதிபலிக்கிறது.

டெலிவரி

விலை விவரங்கள் மற்றும் வாடிக்கையாளர் டெலிவரி தொடக்கம்

சென்னையில் இந்த பைக்கின் எக்ஸ்-ஷோரூம் விலை ₹4.26 லட்சமாக நிர்ணயிக்கப்பட்டுள்ளது.

இது அடிப்படை வல்லம் ரெட் மாடலை விட ₹58,000 மற்றும் பிளாக் குரோம் மாடலை விட ₹43,500 கூடுதல் விலையாகும்.

இருப்பினும், பைக்கின் பிரத்யேகத் தன்மை காரணமாக வாடிக்கையாளர்கள் இதைப் போட்டி போட்டுக்கொண்டு வாங்கியுள்ளனர்.

முன்பதிவு செய்த அதிர்ஷ்டசாலி 125 வாடிக்கையாளர்களுக்கும் இந்த நவம்பர் மாதம் முதல் பைக்குகள் டெலிவரி செய்யப்படவுள்ளதாக அறிவிக்கப்பட்டுள்ளது.