ஆகஸ்ட் மாதம் 5-டோர் தாரை இந்தியாவில் அறிமுகப்படுத்தும் மஹிந்திரா
செய்தி முன்னோட்டம்
இந்த மாதத் தொடக்கத்தில் தங்களுடைய புதிய ஆஃப்ரோடு எஸ்யூவியான 5-டோர் ஜிம்னியை இந்தியாவில் வெளியிட்டது மாருதி சுஸூகி.
தற்போது இந்த 5-டோர் ஜிம்னிக்கு இந்தியாவில் நேரடிப் போட்டியாக எந்த மாடலும் விற்பனையில் இல்லை. இந்தியாவில் ஆஃப்ரோடு எஸ்யூவி விற்பனையில் முன்னணியில் இருக்கும் மஹிந்திரா மற்றும் ஃபோர்ஸ் நிறுவனங்கள் கூட, 3-டோர் எஸ்யூவி மாடல்களையே தற்போது விற்பனை செய்து வருகின்றன.
5-டோர் ஜிம்னியின் வெளியீட்டிற்குப் பிறகு, தங்களுடைய தார் மற்றும் கூர்க்க மாடல்களின் 5-டோர் வெர்ஷன்களையும் இந்தியாவில் அறிமுகப்படுத்தும் முனைப்பில் இருக்கின்றன மஹிந்திராவும், ஃபோர்ஸூம்.
ஃபோர்ஸ் நிறுவனமானது, தங்களுடைய 5-டோர் கூர்க்கா மாடலை இந்திய சாலைகளில் தற்போது சோதனை செய்துவரும் நிலையில், மஹிந்திரா நிறுவனம் தங்களுடைய தார் மாடலின் திரையை விலக்க முடிவு செய்திருக்கிறது.
மஹிந்திரா
மஹிந்திராவின் 5-டோர் தார்:
இந்தியாவின் முன்னணி எஸ்யூவியாக களத்திலிருக்கும் 3-டோர் தாரின், 5-டோர் வெர்ஷனை ஆகஸ்ட் 15-ம் தேதி இந்தியாவில் அறிமுகப்படுத்தத் திட்டமிட்டிருக்கிறது மஹிந்திரா.
இந்த 5-டோர் மாடலில், தங்களின் மற்றொரு மாடலான ஸ்கார்ப்பியோ N மாடல் காரில் பயன்படுத்தப்பட்ட, 200hp பவர் மற்றும் 370Nm டார்க்கை வெளிப்படுத்தக்கூடிய, 4 சிலிண்டர்கள் கொண்ட 2.0 லிட்டர் டர்போசார்ஜ்டு பெட்ரோல் இன்ஜினையே பயன்படுத்தவிருக்கிறது மஹிந்திரா.
மற்றொரு டீசல் இன்ஜின் ஆப்ஷனையும் பட்டியலில் வைத்திருக்கிறது மஹிந்திரா. மேலும், இந்த புதிய 5-டோர் தாரில் மேனுவல் மற்றும் ஆட்டோமேட்டிக் கியர்பாக்ஸ் ஆப்ஷன்களையும் அந்நிறுவனம் வழங்கவிருப்பதாகத் தெரிகிறது.
3-டோர் தாரை விட 5-டோர தாரானது ரூ.2.5 லட்சம் வரை கூடுதலான விலையில் வெளியாகலாம் என எதிர்பார்க்கப்படுகிறது.