ஓட்டுநர் உரிமத்தை உடனே ஒப்படையுங்கள்; 1,700க்கும் மேற்பட்ட திருநங்கைகளின் உரிமங்கள் செல்லாததாக அறிவிப்பு; அமெரிக்காவில் அதிரடி சட்டம்
செய்தி முன்னோட்டம்
அமெரிக்காவின் கன்சாஸ் மாநிலத்தில் வசிக்கும் திருநங்கைகளின் ஓட்டுநர் உரிமங்களைச் செல்லாததாக்கி அம்மாநில அரசு புதிய சட்டத்தைக் கொண்டு வந்துள்ளது. இந்தச் சட்டத்தின்படி, ஒரு நபரின் அடையாள ஆவணங்களில் அவர் பிறப்பின் போது இருந்த பாலினமே குறிப்பிடப்பட வேண்டும். இந்த நடவடிக்கைக்கும் ஓட்டுநரின் திறமைக்கும் எந்தத் தொடர்பும் இல்லை என்றாலும், அரசு ஆவணங்களில் பாலினப் பதிவு எவ்வாறு இருக்க வேண்டும் என்பதில் இந்த சட்டம் கவனம் செலுத்துகிறது.
உத்தரவு
உடனடியாக அமலுக்கு வந்த உத்தரவு
இந்தச் சட்டம் கன்சாஸ் பதிவேட்டில் வெளியிடப்பட்ட உடனேயே, அதாவது பிப்ரவரி 26, 2026 முதல் அமலுக்கு வந்துள்ளது. ஜனநாயகக் கட்சியைச் சேர்ந்த கவர்னர் லாரா கெல்லியின் வீட்டோ அதிகாரத்தை மீறி, சட்டமன்ற உறுப்பினர்கள் இந்தச் சட்டத்தை நிறைவேற்றினர். இந்தச் சட்டத்தில் எவ்விதமான கூடுதல் கால அவகாசமும் வழங்கப்படாததால், சட்டப் புத்தகத்தில் இது பதிவான அடுத்த நிமிடமே திருநங்கைகளின் தற்போதைய உரிமங்கள் அனைத்தும் செல்லாததாகிவிட்டன.
பாதிப்பு
பாதிக்கப்பட்டவர்களுக்கு வந்த எச்சரிக்கை கடிதம்
பாதிக்கப்பட்ட குடியிருப்பாளர்களுக்கு மாநில அரசு அதிகாரப்பூர்வமாகக் கடிதங்களை அனுப்பியுள்ளது. அதில், "எங்கள் பதிவுகளின்படி பிப்ரவரி 26 முதல் உங்கள் அடையாள ஆவணங்கள் செல்லாததாகிவிட்டன. முறையான ஆவணங்கள் இன்றி வாகனங்களை ஓட்டினால் அபராதம் உள்ளிட்ட சட்ட நடவடிக்கைகளைச் சந்திக்க நேரிடும்" என்று எச்சரிக்கப்பட்டுள்ளது. குறைந்தபட்சம் 1,700 ஓட்டுநர் உரிமங்கள் மற்றும் 1,800 பிறப்புச் சான்றிதழ்கள் இதற்காக மீண்டும் மாற்றியமைக்கப்படும் என்று அதிகாரிகள் எதிர்பார்க்கின்றனர்.
அமெரிக்கா
அமெரிக்காவின் பிற மாநிலங்களில் உள்ள நிலை
அமெரிக்காவின் புளோரிடா, டென்னசி மற்றும் டெக்சாஸ் போன்ற பிற மாநிலங்களும் ஓட்டுநர் உரிமங்களில் பாலின மாற்றங்களுக்குக் கட்டுப்பாடுகளை விதித்துள்ளன. இருப்பினும், ஏற்கனவே வழங்கப்பட்ட உரிமங்களை ரத்து செய்து, அவற்றை மீண்டும் பழைய நிலைக்கு மாற்ற வேண்டும் என்று கட்டாயப்படுத்தும் முதல் மாநிலமாக கன்சாஸ் உருவெடுத்துள்ளது. பாதிக்கப்பட்டவர்கள் தங்களின் பழைய உரிமங்களை அரசிடம் ஒப்படைத்துவிட்டு, பிறப்பின் போது இருந்த பாலினத்தைக் கொண்ட புதிய உரிமங்களைப் பெற்றுக்கொள்ளுமாறு அறிவுறுத்தப்பட்டுள்ளனர்.