இனி வண்டி ஓட்டும்போது உஷார்! ஓட்டுநர் உரிமத்தை ரத்து செய்யப்போகும் புதிய பாயிண்ட் சிஸ்டம் விரைவில் அறிமுகம்
செய்தி முன்னோட்டம்
இந்தியாவில் சாலை விபத்துகளையும், அதனால் ஏற்படும் உயிரிழப்புகளையும் குறைக்க மத்திய அரசு ஒரு புரட்சிகரமான பாயிண்ட் அடிப்படையிலான ஓட்டுநர் உரிம முறையை அறிமுகப்படுத்தத் தயாராகி வருகிறது. டெல்லி தேசிய சாலை பாதுகாப்பு மாநாட்டில் பேசிய மத்திய அமைச்சர் நிதின் கட்கரி, ஆண்டுதோறும் இந்தியாவில் சுமார் 5 லட்சம் விபத்துகள் நடப்பதையும், அதில் 1.8 லட்சம் பேர் உயிரிழப்பதையும் சுட்டிக்காட்டினார். குறிப்பாக 18 முதல் 45 வயதுக்குட்பட்ட இளைஞர்களே இதில் அதிகம் பாதிக்கப்படுவதால், இந்த கடுமையான விதிமுறை கொண்டுவரப்படுகிறது.
செயல்பாடு
பாயிண்ட் சிஸ்டம் எப்படிச் செயல்படும்?
இந்த புதிய முறையின்படி, ஒவ்வொரு முறை நீங்கள் போக்குவரத்து விதிகளை மீறும்போதும் உங்கள் ஓட்டுநர் உரிமத்தில் இருந்து குறிப்பிட்ட புள்ளிகள் குறைக்கப்படும் அல்லது அபராதப் புள்ளிகள் சேர்க்கப்படும். நிர்ணயிக்கப்பட்ட புள்ளிகளின் எல்லையைத் தாண்டும்போது, உங்களது ஓட்டுநர் உரிமம் 6 மாதங்களுக்குத் தற்காலிகமாக ரத்து செய்யப்படும். மீண்டும் மீண்டும் விதிகளை மீறுபவர்கள் மற்றும் கடுமையான குற்றங்களில் ஈடுபடுபவர்களின் உரிமம் நிரந்தரமாக ரத்து செய்யப்பட வாய்ப்புள்ளது. அதிவேகமாகச் செல்லுதல், மது அருந்திவிட்டு வாகனம் ஓட்டுதல், செல்போன் பேசிக்கொண்டு ஓட்டுதல் மற்றும் தவறான திசையில் வாகனம் ஓட்டுதல் ஆகியவற்றுக்கு அதிக புள்ளிகள் குறைக்கப்படும்.
மாற்றம்
உரிமம் புதுப்பித்தலில் மாற்றம்
தற்போது ஓட்டுநர் உரிமத்தைப் புதுப்பிக்கும்போது எந்தவிதமான தேர்வோ அல்லது சோதனையோ நடத்தப்படுவதில்லை. ஆனால், புதிய விதிகளின்படி, போக்குவரத்து விதிமீறல் பின்னணி கொண்டவர்கள் தங்களது உரிமத்தைப் புதுப்பிக்க விரும்பினால், மீண்டும் ஒருமுறை ஓட்டுநர் தேர்வில் தேர்ச்சி பெறுவது கட்டாயமாக்கப்பட உள்ளது. பொறுப்பான ஓட்டுநர்கள் மட்டுமே சாலையில் இருப்பதை உறுதி செய்ய இந்த நடவடிக்கை எடுக்கப்படுகிறது.
மரணம்
பூஜ்ய மரண மண்டலங்கள்
இந்தியாவில் அதிக விபத்துகள் நடக்கும் 100 மாவட்டங்களை மத்திய அரசு அடையாளம் கண்டுள்ளது. இந்த மாவட்டங்களில் விபத்துகளால் ஏற்படும் உயிரிழப்புகளை பூஜ்யமாக்க சிறப்புப் பாதுகாப்பு நடவடிக்கைகள் மேற்கொள்ளப்படும். ஆஸ்திரேலியா, இங்கிலாந்து, ஜெர்மனி மற்றும் பிரான்ஸ் போன்ற நாடுகளில் வெற்றிகரமாகச் செயல்படுத்தப்பட்டு வரும் இந்த பாயிண்ட் முறையைப் பின்பற்றுவதன் மூலம், இந்தியாவில் சாலை விதிகள் மீதான பயமும் மரியாதையும் அதிகரிக்கும் என்று எதிர்பார்க்கப்படுகிறது.