ஹீரோ மோட்டோகார்ப் ஃபியூச்சரிஸ்டிக் அம்சங்களுடன் கூடிய 2025 கிளாமர் 125 பைக்கின் டீஸரை வெளியிட்டது
செய்தி முன்னோட்டம்
ஹீரோ மோட்டோகார்ப் நிறுவனம் செவ்வாய்க்கிழமை (ஆகஸ்ட் 19) அன்று, மேம்படுத்தப்பட்ட 2025 ஹீரோ கிளாமர் 125 பைக்கை இந்திய சந்தையில் அறிமுகப்படுத்த உள்ளது. அதற்கு முன்னோட்டமாக ஹீரோ நிறுவனம் வெளியிட்டுள்ள புதிய டீஸரில், இந்த பைக்கை இந்தியாவின் மிகவும் ஃபியூச்சரிஸ்டிக் 125சிசி என்று தெரிவித்துள்ளது. இதன் மூலம், இந்த பைக்கில் குறிப்பிடத்தக்க மாற்றங்கள் இருக்கும் என்று எதிர்பார்க்கப்படுகிறது. நிறுவனம் சரியான விவரங்களை வெளியிடாத நிலையில், டீஸர் மற்றும் ஸ்பை ஷாட்கள் புதிய அம்சங்களை வெளிப்படுத்துகின்றன. மிக முக்கியமான மாற்றம் என்னவென்றால், இதில் ஹீரோ XMR 210-ஐப் போன்றே முற்றிலும் புதிய டிஜிட்டல் இன்ஸ்ட்ருமென்ட் கிளஸ்டர் இடம்பெறுகிறது.
க்ரூஸ் கண்ட்ரோல்
க்ரூஸ் கண்ட்ரோல் அம்சம்
திரையில் Set Speed என்ற வாசகம் இருப்பதன் மூலம், இதில் க்ரூஸ் கண்ட்ரோல் அம்சம் சேர்க்கப்பட்டிருக்கலாம் என்று தெரிகிறது. இது 125சிசி பிரிவில் அரிதான ஒன்றாகும். மேலும், அனைத்து எல்இடி விளக்குகள், யுஎஸ்பி டைப்-சி சார்ஜிங் போர்ட் மற்றும் புளூடூத் இணைப்பு போன்ற அம்சங்களும் எதிர்பார்க்கப்படுகின்றன. வடிவமைப்பைப் பொறுத்தவரை, புதிய கிளாமர் 125, அதன் தற்போதைய மாடலின் ஸ்போர்ட்டி தோற்றத்தை புதிய கிராபிக்ஸ், டேங்க் ஷிரவுட்கள் மற்றும் நேர்த்தியான பாடியுடன் தக்கவைத்துக்கொள்ளும் என்று எதிர்பார்க்கப்படுகிறது. என்ஜினைப் பொறுத்தவரை, அதே 124.7சிசி, சிங்கிள்-சிலிண்டர், ஏர்-கூல்டு யூனிட், 5-ஸ்பீட் கியர்பாக்ஸுடன் 10.39 ஹெச்பி மற்றும் 10.6 என்எம் டார்க்கை உருவாக்கும் திறன் கொண்டதாக இருக்கும் எனத் தெரிகிறது.