அடையாளம் தெரியாத பறக்கும் பொருளை சுட்டு வீழ்த்திய அமெரிக்கா
அமெரிக்காவின் போர் விமானம் ஒன்று நேற்று(பிப் 10) அலாஸ்காவின் வானில் பறந்து கொண்டிருந்த அடையாளம் தெரியாத பொருளை சுட்டு வீழ்த்தியது. புதிய பறக்கும் பொருளின் நோக்கம் அல்லது அது எங்கிருந்து வந்தது என்பது தெளிவாகத் தெரியவில்லை. ஆனால் 40,000 அடி உயரத்தில் பறந்து கொண்டிருந்ததால் அது சிவில் விமானப் போக்குவரத்துக்கு அச்சுறுத்தலாக இருந்தது. அதனால் தான் அது சுட்டு வீழ்த்தப்பட்டது என்று வெள்ளை மாளிகையின் தேசிய பாதுகாப்பு கவுன்சில் செய்தித் தொடர்பாளர் ஜான் கிர்பி கூறியுள்ளார். மேலும், "அதிபர் அதை சுட்டு வீழ்த்த ராணுவத்திற்கு உத்தரவிட்டார்." என்று கிர்பி கூறி இருக்கிறார். இந்த சம்பவம் குறித்து வெள்ளை மாளிகையில் செய்தியாளர்கள் கேள்வி எழுப்பியபோது, துப்பாக்கிச் சூடு "வெற்றிகரமாக முடிக்கப்பட்டது" என்று பைடன் கூறியுள்ளார்.
ஒரு சிறிய காரின் அளவு இருந்த அடையாளம் காணப்படாத பறக்கும் பொருள்
கடந்த வாரம் அமெரிக்க வான்வெளியில் காணப்பட்ட சீன பலூனை விட இந்த பொருள் மிகவும் சிறியது என்றும், சனிக்கிழமை அட்லாண்டிக் கடற்கரையில் அமெரிக்க போர் விமானத்தால் அது சுட்டு வீழ்த்தப்பட்டது என்றும் கிர்பி கூறினார். அது "தோராயமாக ஒரு சிறிய காரின் அளவு இருந்தது" என்று அவர் கூறியுள்ளார். "இது அரசுக்கு சொந்தமானதா அல்லது கார்பரேட் நிறுவனத்திற்கு சொந்தமானதா என்பது எங்களுக்குத் தெரியாது," என்று கூறிய அவர் "எங்களுக்கு முழு நோக்கமும் புரியவில்லை." என்றும் தெரிவித்திருக்கிறார். F-22 ராப்டார் AIM-9X ஏவுகணையைப் பயன்படுத்தி அந்தப் பொருள் வீழ்த்தபட்டது என்றும் அதே ஏவுகணை மற்றும் வெடிமருந்துகள் தான் சீன 'வேவு' பலூனை வீழ்த்தவும் பயன்படுத்தப்பட்டன என்றும் பென்டகன் செய்தித் தொடர்பாளர் பாட்-ரைடர் கூறியுள்ளார்
இந்த காலவரிசையைப் பகிரவும்