பயங்கர வெடிப்பு, 30 பேரின் கருகிய உடல்கள் மீட்பு! பிலிப்பைன்ஸ் படகு விபத்தில் பலி எண்ணிக்கை உயர்வு
செய்தி முன்னோட்டம்
பிலிப்பைன்ஸ் நாட்டில் பயங்கர தீ விபத்துக்கு உள்ளான எம்பி ஜூன் ஆஸ்டர் என்ற பயணிகள் படகில் இருந்து மீட்கப்பட்ட 30 பேரின் கருகிய உடல்கள் சனிக்கிழமை (செப்டம்பர் 12) அடையாளம் காண்பதற்காக கொரோன் துறைமுகத்திற்குக் கொண்டு வரப்பட்டுள்ளன. மணிலாவில் இருந்து புறப்பட்ட இந்தப் படகில் மொத்தம் 132 பயணிகள் இருந்த நிலையில், கடந்த புதன்கிழமை இரவு ஏற்பட்ட இந்தத் தீ விபத்தில் இதுவரை 35 பேர் உயிரிழந்துள்ளனர். மேலும் 50க்கும் மேற்பட்டோரைக் காணாத நிலையில், மீட்புக் குழுவினர் படகின் இடிபாடுகளுக்குள் தொடர்ந்து தேடுதல் பணியில் ஈடுபட்டு வருகின்றனர்.
பின்னணி
தீ விபத்தின் பின்னணி மற்றும் பயங்கரம்
துறைமுகத்தை அடைவதற்கு சில கிலோமீட்டர் தொலைவில் இருந்தபோது, படகின் சரக்குக் கிடங்கில் திடீரென ஏற்பட்ட வெடிப்புச் சத்தத்தைத் தொடர்ந்து இந்தத் தீ பரவியதாகத் தப்பிய பயணிகள் தெரிவித்துள்ளனர்.
அப்போது வீசிய பலத்தக் காற்றினால் தீ படகு முழுவதும் நொடிப் பொழுதில் பரவியதால், பெரும்பாலான பயணிகளால் பாதுகாப்பு உடைகளைக் கூட அணிய முடியாமல் போனது.
படகின் திறந்த பகுதிகள் தார்ப்பாய்களால் மூடப்பட்டிருந்ததும், மக்கள் அவசரமாக வெளியேற முடியாமல் உள்ளேயே சிக்கிக் கொண்டதற்குக் காரணமாக இருக்கலாம் என சந்தேகிக்கப்படுகிறது.
விசாரணை
படகு கேப்டன் மற்றும் ஊழியர்கள் மீது விசாரணை
இந்த விபத்து குறித்து பிலிப்பைன்ஸ் கடலோரக் காவல் படை மற்றும் கடல்சார் பாதுகாப்பு அமைப்புகள் குற்றவியல் விசாரணையைத் தொடங்கியுள்ளன.
படகின் கேப்டன் விபத்தில் இருந்து தப்பியதாகக் கூறப்படும் நிலையில், அவர் தப்பியவர்கள் பட்டியலில் இடம்பெறாததால் அவரை அதிகாரிகள் தீவிரமாகத் தேடி வருகின்றனர்.
விபத்தின் போது அவசர எச்சரிக்கை மணி அடிக்கப்பட்டதா, பயணிகளைப் பாதுகாப்பாக வெளியேற்றக் கப்பல் ஊழியர்கள் தகுந்த நடவடிக்கைகளை எடுத்தனரா என்பது குறித்தும் அதிகாரிகள் தீவிரமாக ஆய்வு செய்து வருகின்றனர்.
தொடர் விபத்து
பிலிப்பைன்ஸ் கடற்பகுதியில் தொடரும் விபத்துக்கள்
விபத்து நடந்த படகில் 306 பயணிகள் வரை செல்ல அனுமதி இருந்தபோதிலும், பாதுகாப்பு விதிமுறைகள் சரியாகப் பின்பற்றப்பட்டதா என்பது குறித்துத் தடயவியல் குழுவினர் ஆய்வு செய்து வருகின்றனர்.
தீயில் கருகிய உடல்களைப் பெற்றோர் மற்றும் உறவினர்கள் அடையாளம் காண்பதில் பெரும் சிரமம் ஏற்பட்டுள்ளது.
பிலிப்பைன்ஸ் தீவுக்கூட்டங்களில் பராமரிப்புக் குறைபாடு மற்றும் முறையான பாதுகாப்பு விதிகளின்மையால் அடிக்கடி ஏற்படும் இதுபோன்ற கடல் விபத்துக்கள், அந்நாட்டு மக்களிடையே பெரும் அதிர்ச்சியையும் சோகத்தையும் ஏற்படுத்தியுள்ளன.