ஈரான் அதிபரின் மரணத்தில் எங்களுக்கு தொடர்பு இல்லை: இஸ்ரேல்
ஈரான் அதிபர் இப்ராஹிம் ரைசி ஹெலிகாப்டர் விபத்தில் உயிரிழந்ததற்கும் இஸ்ரேலுக்கும் தொடர்பில்லை என்று இஸ்ரேலிய அதிகாரி ஒருவர் நேற்று தெரிவித்தார். கடந்த ஞாயிற்றுக்கிழமை நடந்த ஹெலிகாப்டர் விபத்தில் அதிபர் ரைசி, வெளியுறவு அமைச்சர் ஹொசைன் அமிரப்துல்லாஹியன், ஆறு பயணிகள் மற்றும் பணியாளர்கள் கொல்லப்பட்டனர். இந்நிலையில், இது குறித்து கருத்து தெரிவித்திருக்கும் ஒரு இஸ்ரேல் அதிகாரி, "அது நாங்கள் இல்லை," என்று கூறியுள்ளார். தனது பெயரை வெளியிட விரும்பாத அந்த அதிகாரி இந்த கருத்தை செய்தி நிறுவனமான ராய்ட்டர்ஸிடம் கூறியுள்ளார். அஜர்பைஜான் அதிபர் இல்ஹாம் அலியேவ் உடன் ஒரு அணையைத் திறந்து வைப்பதற்காக மே 19 அன்று ரைசி அஜர்பைஜானுக்கு சென்றிருந்தார்.
ஹமாஸுக்கு ஆதரவளித்த வந்த ஈரான்
அதன் பிறகு, அதிபர் திரும்பும் வழியில் அவரது ஹெலிகாப்டர், தெஹ்ரானில் இருந்து 600 கி.மீ தொலைவில் கிழக்கு அஜர்பைஜானில் உள்ள ஜோல்பாவில் விபத்துக்குள்ளானது. அதிபர் ரைசி, வெளியுறவு அமைச்சர் ஹொசைன் அமீர்-அப்துல்லாஹியன் மற்றும் பிற அதிகாரிகளை ஏற்றிச் சென்ற ஹெலிகாப்டர், விமானம் புறப்பட்ட சுமார் 30 நிமிடங்களில் தொடர்பை இழந்தது. கடந்த அக்டோபர் மாதம் பாலஸ்தீன பயங்கரவாத குழு ஹமாஸ், இஸ்ரேல் மீது தாக்குதல் நடத்தியதை அடுத்து, இஸ்ரேல் மற்றும் ஹமாஸுக்கு இடையே பெரும் போர் வெடித்தது. இந்த போரில் ஹமாஸுக்கு ஆதரவளித்ததுடன், ஈரான், லெபனான் ஷியா போராளிகளான ஹெஸ்பொல்லாவுடன் இணைந்து இஸ்ரேலுடன் நேரடி மோதலில் ஈடுபட்டது. அதனால், ஈரான் அதிபரை கொன்றது இஸ்ரேலாக இருக்கலாம் என்ற சந்தேகம் எழுந்தது.
